Studentët në Universitetin e Korçës kanë vijuar bojkotin e mësimit, në mbështetje të protestës studentore e ...
BOTA
Fenomen i pazakontë sizmik në Tenerife
PiranjatPërditësimi i fundit 12 February 2026, 13:45
Një aktivitet i pazakontë sizmik ka tërhequr vëmendjen e ekspertëve rreth Cañadas del Teide në Tenerife.
Në disa ditë janë regjistruar rreth 90 tërmete të vogla, ndërsa mëngjesin e së mërkurës u regjistrua një sinjal i ngjashëm, megjithëse më i dobët.
Kjo rritje e papritur dhe e vazhdueshme e aktivitetit nuk është normale dhe konsiderohet fenomen i pazakontë për këtë zonë.
Itahiza Domínguez, drejtoreshë e Institutit Gjeografik të Ishujve Kanarie, shpjegon se Mali Teide është aktiv nën sipërfaqe, por kjo nuk do të thotë se ekziston rrezik shpërthimi i menjëhershëm. “Ky është një fenomen që nuk ka pasur monitorim para shpërthimeve të mëparshme, prandaj është e rëndësishme të ndiqet dhe të analizohet me kujdes,” tha ajo.
Instrumentet e Involcan, institucioni që monitoron vullkanet në Tenerife, kanë regjistruar sinjale me frekuencë të ulët (2–10 Hz) dhe një vazhdimësi që nuk ishte vërejtur më parë. Këto dridhje ndodhin në thellësi 8–12 kilometra dhe kanë magnitudë të ulët (deri 1.7), duke treguar se aktiviteti ka të bëjë me qarkullimin dhe presionin e fluideve hidrotermale nën tokë, një fenomen vullkanik i zakonshëm në Teide, por në këtë shkallë i pazakontë.
Që nga 7 shkurti, janë regjistruar mbi 260 tërmete të vegjël në këtë zonë. Shkencëtarët shpjegojnë se, ndonëse është fenomen i pazakontë, nuk ka shenja se do të ndodhë shpërthim në afat të shkurtër ose të mesëm.
Ekspertët nënvizojnë se Tenerife mbetet një zonë aktive vullkanike, me gjashtë shpërthime historike gjatë 600 viteve të fundit dhe shumë shpërthime gjatë 11,700 viteve të fundit. Aktiviteti i fundit përforcon faktin se vullkani Teide është ende i gjallë, pa shenja të qarta të zbehjes.
Banorëve u bëhet apel që të jenë të qetë, por situata të ndiqet nga afër nga shkencëtarët.
Fenomeni i pazakontë sizmik rikonfirmon rëndësinë e monitorimit të vazhdueshëm të vullkanit më të njohur të Spanjës dhe një prej ikonave natyrore të Tenerife./Përktheu Piranjat News
