FOTO- Dy fëmijë të vegjël gjenden në banesën me 40 mace, një qen të ngordhur dhe mbeturina. Policia prangos prindërit

Një fëmijë 5-vjeçar dhe një foshnjë 8-muajshe u shpëtuan nga autoritetet federale pasi u gjetën duke jetuar në kushte të rënda brenda një banese të mbushur me mbeturina dhe jashtëqitje.

FBI -ja ekzekutoi një urdhër kërkimi në shtëpinë në Pensilvani , për shkak të kërcënimeve terroriste të bëra kundër Shtëpisë së Bardhë kur ata bënë zbulimin.

Gjatë kontrollit, autoritetet zbuluan dy fëmijët duke jetuar në kushte të papërshtatshme higjienike, çka çoi në ndërhyrjen për shpëtimin e tyre. Fëmijët u gjetën në kushte të tmerrshme, me mbeturina, jashtëqitje dhe pa ujë të rrjedhshëm.

Autoritetet federale mbërritën në një banesë në verilindje të Filadelfias rreth orës 11:00 të së martës, duke zhvilluar një "operacion të autorizuar nga gjykata për zbatimin e ligjit", sipas Departamentit të Policisë së Filadelfias. Sipas televizionit lokal WPVI-TV, kontrolli lidhej me kërcënime terroriste.

Në vendngjarje, zyrtarët kontaktuan me 44-vjeçaren Megan Bach dhe hynë në banesë, ku "konstatuan se prona ishte e pasigurt për shkak të kushteve të mjerueshme të jetesës", tha policia. Pas zbulimit të një ere të fortë brenda shtëpisë, hetuesit kërkuan ndërhyrjen e një ekipi për materiale të rrezikshme. Brenda banesës, agjentët gjetën fëmijët duke jetuar në kushte të rënda higjienike, mes jashtëqitjeve, grumbujve me mbeturina, pleshtave dhe pa ujë të rrjedhshëm.

Në brendësi të shtëpisë dukej gjithashtu se kishte grumbuj papastërtish pranë derës së hyrjes, ndërsa një mace shihej pas shiritit të sigurisë, teksa autoritetet vijonin punën në vendngjarje. Fëmijët u gjetën të mbuluar me mavijosje dhe pickime insektesh. Autoritetet zbuluan gjithashtu disa kafshë brenda shtëpisë, përfshirë rreth 40 mace dhe të paktën një qen të ngordhur.

Disa kuti me prova, qese me mbeturina, kafaze për mace dhe armë zjarri u nxorën nga banesa, e cila tashmë është mbyllur me dërrasa nga autoritetet.

Fqinjët thanë se kishin vënë re një erë të fortë që vinte nga shtëpia dhe se pothuajse nuk i kishin parë kurrë banorët e saj.

"Sa herë që kaloja pranë, vinte një erë shumë e keqe, nga rëra e maceve dhe gjithçka tjetër. Ishte një aromë e tmerrshme sa herë që ecje aty pranë", i tha Vex Holmquist televizionit WPVI. Fëmija 5-vjeçar dhe foshnja 8-muajshe u transportuan në një spital lokal për vlerësim mjekësor, njoftoi policia e Filadelfias. /Piranjat News/

Galeria fotografike (

)