Gara presidenciale/ Apeli francez jep dritën jeshile për Le Pen

Marine Le Pen mund të jetë sërish pjesë e garës për presidencën franceze vitin e ardhshëm, pas vendimit të Gjykatës së Apelit në Paris që ndryshoi masën e ndalimit të saj për të kandiduar.

Vendimi i jep fund, të paktën për momentin, pasigurisë rreth të ardhmes së saj politike dhe e rikthen Le Pen në qendër të garës presidenciale. Ajo pritet të jetë një kandidate më e fortë sesa zëvendësuesi i mundshëm i saj, Jordan Bardella.

Gjykata nuk e ka shpallur Le Pen të pafajshme. Ajo mbetet e dënuar për përvetësimin e më shumë se 4 milionë eurove nga fondet e Parlamentit Europian. Megjithatë, gjyqtarët vendosën të ulin ndalimin pesëvjeçar për kandidimin politik, të vendosur nga gjykata penale e Parisit, duke e konsideruar periudhën e kaluar si të vuajtur.

Tashmë, Le Pen mund të nisë përgatitjet për zgjedhjet presidenciale, ndërsa apeli i saj në gjykatën më të lartë të Francës mbetet ende një faktor që mund të ndikojë në të ardhmen e saj politike.

Partia e saj, ka zgjedhur një slogan të ri për fushatën: “Rilindja”. Mesazhi lidhet drejtpërdrejt me rikthimin politik të Le Pen dhe synimin e partisë për të paraqitur një “rilindje” të Francës.

Dy sondazhe të zhvilluara pas pezullimit të saj kanë treguar se Le Pen mbetet një figurë jashtëzakonisht konkurruese dhe mund të mposhtë kundërshtarë të ndryshëm në një raund të dytë presidencial.

Një sondazh i fundit e nxirrte Le Pen fituese ndaj ish-kryeministrit Édouard Philippe, me 54% kundrejt 46% në raundin e dytë. Mbështetja e saj rezulton veçanërisht e fortë edhe te votuesit mbi 65 vjeç, një grup me peshë të madhe në zgjedhjet franceze.

Rikthimi i Le Pen ndryshon edhe ekuilibrat brenda partisë. Jordan Bardella, i cili kishte qenë alternativa kryesore për të drejtuar partinë në zgjedhjet presidenciale, mbetet një figurë e rëndësishme, por Le Pen shihet si politikane me më shumë përvojë dhe peshë elektorale.

Një nga avantazhet e saj është pikërisht eksperienca politike dhe aftësia për t’u paraqitur si një figurë presidenciale, veçanërisht përballë votuesve më të vjetër.

Megjithatë, ekonomia mbetet një pikë e dobët për Le Pen. Performancat e saj në debatet presidenciale të viteve 2017 dhe 2022, veçanërisht për çështjet ekonomike, u shfrytëzuan nga Emmanuel Macron për ta dobësuar atë në raundin e dytë.

Partia e saj vazhdon të mbrojë një program ekonomik që kombinon shpenzime të larta sociale dhe ulje taksash, ndërsa partia ka kërkuar gjithashtu një qasje më pragmatike ndaj Bashkimit Europian.

Me rikthimin e Le Pen, gara presidenciale franceze pritet të bëhet edhe më e fortë. Ajo nuk e ka ende të garantuar kandidimin përfundimtar, por vendimi i Apelit i ka dhënë një mundësi të re për të kërkuar postin më të lartë politik në Francë.