Komisioni Europian po shqyrton mundësinë e një “Akti për Ujin”, i cili do të vendoste një kuadër më të...
BOTA
Gëlltiti sustën e stilolapsit, shpëton mrekullisht 7-vjeçari
PiranjatPërditësimi i fundit 4 Maj 2026, 10:21
Një incident i rrezikshëm është regjistruar, ku një nxënës 7-vjeçar në Greqi ka qenë në rrezik serioz për jetën pasi gëlltiti një sustë stilolapsi, e cila përfundoi në mushkërinë e tij të djathtë. Fëmija u dërgua me urgjencë në spital nga prindërit, pasi shfaqi kollë të fortë dhe vështirësi në frymëmarrje. Sipas mjekut otorinolaringolog Minas Artopoulos, i cili kreu ndërhyrjen, rasti ishte i veçantë dhe kërkonte veprim të menjëhershëm.
“Prindërit më treguan se fëmija, gjatë lojës dhe leximit, kishte futur në gojë një sustë gome që më pas e gëlltiti aksidentalisht. Menjëherë pas kësaj filloi kollë e fortë dhe probleme me frymëmarrjen,” ka deklaruar mjeku. Pas ekzaminimit me rreze X, u zbulua se objekti me përmasa rreth 12 milimetra kishte përfunduar në bronkun kryesor të mushkërisë së djathtë, në vend që të shkonte në stomak. Mjekët kryen menjëherë një bronkoskopi rigide, një procedurë që zgjati rreth 15 minuta, gjatë së cilës susta u hoq me sukses pa shkaktuar dëmtime në rrugët e frymëmarrjes.
Pas disa orësh monitorimi, fëmija u lirua nga spitali në gjendje të mirë shëndetësore dhe u kthye në shtëpi. Mjekët theksojnë se raste të tilla mund të jenë shumë të rrezikshme për fëmijët e vegjël dhe kërkojnë vëmendje të madhe nga prindërit, pasi objektet e vogla mund të përfundojnë në rrugët e frymëmarrjes dhe të shkaktojnë komplikacione serioze si infeksione apo bllokim të mushkërive. Në rast dyshimi për gëlltitje ose thithje të një objekti, rekomandohet kërkimi i menjëhershëm i ndihmës mjekësore dhe mosneglizhimi i simptomave si kollë e vazhdueshme, fishkëllimë në frymëmarrje apo vështirësi në ajër.
