Gjykata e Jerusalemit bllokon "Burgun e Krokodilëve" të Ben-Gvirit

Izraeli ka ndaluar planin për përdorimin e krokodilëve si pjesë e masave të sigurisë në burgjet ku mbahen të burgosur palestinezë të akuzuar ose dënuar për terrorizëm.

Gjykata e Qarkut të Jerusalemit ka lëshuar një urdhër që bllokon planin e ministrit të Sigurisë Kombëtare, Itamar Ben Gvir, për vendosjen e aligatorëve rreth Burgut Ketziot, ku mbahen të burgosur palestinezë. Lajmi u raportua nga Jerusalem Post.

Gjykata bllokon "burgun e krokodilëve"

Vendimi i gjykatës erdhi pas një padie të paraqitur javët e fundit nga organizata për mbrojtjen e kafshëve "Lërini Kafshët të Jetojnë", pasi autoritetet izraelite kishin nisur përgatitjet për zbatimin e planit.

Propozimi i Ben Gvir parashikonte rrethimin e burgut me zvarranikë për të "forcuar efektin parandalues" dhe për të penguar arratisjet e mundshme.

Reagimi i organizatës për mbrojtjen e kafshëve

"Krokodilët nuk janë armë, as mjete ndëshkimi apo instrumente të fushatave politike", deklaroi organizata.

"Në këtë fazë, urdhri i gjykatës parandalon krijimin e një situate të pakthyeshme, që do t'u shkaktonte vuajtje të rënda kafshëve dhe do të çonte në shpërdorimin e miliona shekelëve", thuhet më tej në reagimin e saj.

Ben Gvir: "Gjyqtarët po ndihmojnë terroristët"

Ministri Itamar Ben Gvir reagoi ashpër ndaj vendimit, duke akuzuar gjyqtarët se "po mbajnë anën e terroristëve".

"Edhe një herë, në kohë lufte, sistemi gjyqësor po mban anën e terroristëve, duke penguar masa të rëndësishme për forcimin e parandalimit të Izraelit", deklaroi Ben Gvir, cituar nga Jerusalem Post. /Piranjat News/