Teksa largohej nga mbledhja e ditës së parë me ministrat në Pogradec, kryeministri Edi Rama u afrua i ngrysur tek Mercedesi Benz S-Class, ...
BOTA
Grabitje spektakolare në Saint-Tropez, katër persona të armatosur terrorizojnë familjen e miliarderit brazilian
PiranjatPërditësimi i fundit 24 Gusht 2026, 14:58
Një familje braziliane me pasuri të jashtëzakonshme përjetoi momente terrori në një vilë luksoze në Saint-Tropez, pasi katër burra të armatosur hynë me forcë në rezidencë gjatë orëve të para të mëngjesit dhe kërcënuan banorët për t’u marrë para, bizhuteri dhe sende me vlerë. Biznesmeni brazilian, pasuria e të cilit vlerësohet në rreth 1.4 miliardë dollarë, kishte marrë me qira vilën për dy javë, së bashku me bashkëshorten dhe dy djemtë e tij. Rezidenca, me pamje nga Mesdheu dhe Gjiri i Saint-Tropez, dyshohet se ishte përzgjedhur më herët nga autorët e grabitjes.
Ngjarja ndodhi rreth orës 03:30 të 16 korrikut, pak pasi dy djemtë e biznesmenit ishin kthyer nga një mbrëmje në Saint-Tropez, së bashku me partneret e tyre.
Katër grabitësit, nga Marseja, mbërritën pranë vilës me një automjet të vjedhur. Ata ishin të armatosur me një pistoletë gjysmëautomatike dhe kishin me vete çekiç, lidhëse kabllosh, shirit ngjitës, sprej piperi dhe pajisje për bllokimin e sinjalit. Fillimisht sulmuan rojen e sigurisë, të cilin e kërcënuan me armë dhe e detyruan të mbyllte qenin në automjet. Më pas e çuan drejt vilës dhe e neutralizuan duke përdorur sprej piperi. Brenda rezidencës, grabitësit hynë në dhomat e familjarëve dhe i kërcënuan me armë. Një prej djemve ishte me partneren e tij australiane, të cilës një nga autorët i drejtoi armën në kokë dhe i kërkoi në anglisht të dorëzonte paratë.
Në dhomën e gjumit, edhe miliarderi dhe bashkëshortja e tij u përballën me grabitësit, të cilët kërkuan të dinin se ku mbaheshin bizhuteritë dhe orët e shtrenjta. Banorët u lidhën dhe u grumbulluan në një nga dhomat e vilës, ndërsa autorët nisën të kontrollonin rezidencën. Në kaosin e krijuar, një grua e re që ishte zgjuar nga zhurmat arriti t’u shpëtonte grabitësve. Ajo mori telefonin dhe u fsheh në kopshtin e vilës, prej nga telefonoi autoritetet pak para orës 05:00. Policia mbërriti brenda pak minutash. Tre nga të dyshuarit u arrestuan në përpjekje për t’u larguar, ndërsa i katërti u fsheh fillimisht në çatinë e rezidencës.
Ai u gjet më vonë dhe u arrestua. Bëhet fjalë për një 29-vjeçar, i cili raportohet se plagosi një efektiv policie gjatë arrestimit.
Hetimet zbuluan gjithashtu të dhëna që sugjerojnë se grabitja ishte e organizuar dhe e përgatitur paraprakisht. Autoritetet dyshojnë se vila nuk ishte zgjedhur rastësisht. Katër të dyshuarit janë vendosur nën hetim formal për vepra penale që përfshijnë grabitje të armatosur dhe ndalim të paligjshëm, ndërsa janë lënë në paraburgim. Një prej të dyshuarve pretendoi gjatë marrjes në pyetje se ai dhe një tjetër ishin rekrutuar në Marsejë nga dy persona më të moshuar, të cilët u kishin premtuar përfitime financiare. Ai pretendoi gjithashtu se më pas ishin detyruar të merrnin pjesë në grabitje.
