Greqia në alarm nga zjarret, flakët përfshijnë Porto Germenon, evakuohen banorë dhe digjen shtëpi

Një natë e vështirë është regjistruar në Greqi për shkak të zjarreve masive, ndërsa një nga frontet më problematike është ai në Porto Germeno, ku flakët kanë hyrë në zonat e banuara dhe kanë shkaktuar dëme të konsiderueshme. Me lindjen e ditës, në betejën kundër zjarrit janë angazhuar edhe mjetet ajrore të zjarrfikësve. 18 avionë dhe 7 helikopterë kanë nisur ndërhyrjen nga ajri duke hedhur ujë, me qëllim frenimin e përhapjes së zjarrit shkatërrues që gjatë natës kërcënoi edhe zonën e Psathës.

Zjarri doli jashtë kontrollit gjatë orëve të natës, duke detyruar autoritetet të aktivizojnë vazhdimisht sistemin 112 për evakuimin e banorëve dhe pushuesve. Sipas dëshmive të vullnetarëve, të paktën 8 banesa dhe një automjet zjarrfikës janë djegur nga flakët. Banorët raportuan momente paniku, me shtëpi të përfshira nga zjarri dhe shpërthime të njëpasnjëshme, ndërsa rrugët u bllokuan për shkak të përhapjes së flakëve. Disa dëshmitarë thanë se shpërthimet mund të kenë ardhur nga bombolat, transformatorët elektrikë ose pajisje të tjera në oborret e banesave.

Situata ka qenë veçanërisht e rrezikshme për shkak të temperaturave ekstreme të regjistruara në terren. Një kamerë termike ka evidentuar temperatura deri në 153 gradë Celsius në tokë në zonat e prekura. Për shpëtimin e banorëve është zhvilluar edhe një operacion nga deti. Roja Bregdetare, zjarrfikësit dhe mjete private detare kanë marrë pjesë në evakuimin e qytetarëve, ndërsa policia dhe ekipet zjarrfikëse kanë kryer kontrolle derë më derë për të nxjerrë personat e bllokuar. Si masë paraprake janë evakuuar edhe zonat Agios Nektarios, Agia Paraskevi dhe Kryo Pigadi.

Mbi 300 zjarrfikës në betejë me flakët

Në operacionin e shuarjes janë angazhuar forca të mëdha. Rreth 325 zjarrfikës, 18 grupe të njësive këmbësore EMODE, 92 automjete zjarrfikëse, autocisterna uji dhe mjete të rënda ndërtimi po luftojnë për izolimin e zjarrit. Në terren ndodhen gjithashtu ekipet speciale të ndërhyrjes, dronë me kamera termike dhe optike, ndërsa nga deti janë përdorur mjete të zjarrfikësve dhe Rojës Bregdetare. Gjatë operacionit të shpëtimit, 254 persona janë larguar në mënyrë të sigurt nga zona e Agios Vasilios. Një situatë alarmante është regjistruar edhe në zonën e Akaisë, ku autoritetet aktivizuan sistemin 112 për evakuimin e banorëve në disa vendbanime.

Në zonën e Nerantzies, në Bashkinë e Aigialeias, forcat zjarrfikëse po përballen me një tjetër betejë të vështirë. Në operacion janë përfshirë 75 zjarrfikës, 4 ekipe këmbësore EMODE dhe 21 automjete zjarrfikëse, së bashku me mjete të furnizimit me ujë nga autoritetet lokale. Autoritetet greke vijojnë të monitorojnë situatën, ndërsa temperaturat e larta dhe erërat e forta po e bëjnë më të vështirë kontrollin e vatrave të zjarrit në disa zona të vendit.