Histori në Forcat Ajrore Turke/ Gruaja e parë ngrihet në gradën e gjeneralit

Një ngjarje historike është shënuar në Forcat e Armatosura të Turqisë, pasi kolonelja Ozlem Karapinar është promovuar në gradën e gjeneral brigade, duke u bërë gruaja e parë që arrin gradën e gjeneralit në Forcat Ajrore Turke.

Vendimi u mor gjatë mbledhjes së Këshillit të Lartë Ushtarak, të kryesuar nga presidenti turk Recep Tayyip Erdogan, ku u diskutuan promovimet, emërimet dhe pensionimet brenda Forcave të Armatosura.

Karapinar, oficere e Forcave Ajrore Turke, ka mbajtur gjatë karrierës së saj disa poste dhe është vlerësuar për përvojën e saj në fushën e aviacionit ushtarak.

Me promovimin e saj, ajo bëhet gjeneralja e parë në historinë e Forcave Ajrore Turke. Pas marrjes së kësaj grade, Karapinar do të thirret me titullin tradicional “pasha”.

Në hierarkinë ushtarake turke, gjeneral brigade është grada e parë në nivelin e gjeneralëve. Termi “pasha” përdoret tradicionalisht për t’iu drejtuar oficerëve me gradën gjeneral ose admiral.

Në të njëjtën mbledhje u vendos edhe pensionimi i komandantit të Forcave Ajrore Turke, gjeneralit Ziya Cemal Kadıoglu.