Hungaria kthesë me 180 gradë ndaj Rusisë pas largimit të Orban: Kërcënim për Evropën dhe rendin global

Një ndryshim dramatik po ndodh në politikën e jashtme të Hungarisë pas largimit të ish-kryeministrit Viktor Orbán. Qeveria e re hungareze e ka cilësuar zyrtarisht Rusinë si një “kërcënim për Evropën dhe rendin global” në udhëzimet e hartuara për delegacionin e saj që do të marrë pjesë në Asamblenë e Përgjithshme të OKB-së, raportoi mediatike Der Spiegel.

Ky qëndrim shënon një kthesë rrënjësore nga linja e mëparshme miqësore me Moskën, pasi kryeministri Péter Magyar fitoi zgjedhjet përballë Viktor Orbánit. Në dokumentin zyrtar të qeverisë hungareze thuhet se Hungaria dënon agresionin ushtarak rus dhe mbështet plotësisht sovranitetin e integritetin territorial të Ukrainës brenda kufijve të saj të njohur ndërkombëtarisht, duke konsideruar se sjellja e Rusisë përbën një kërcënim direkt për Hungarinë, Evropën dhe rendin global.

Nën udhëheqjen e re, Budapesti ka marrë një kurs të qartë pro-evropian duke ndërmarrë disa hapa pajtues me Ukrainën. Më 19 gusht, Ministri i Jashtëm ukrainas, Andrii Sybiha, vlerësoi mbylljen nga Hungaria të hetimit për pastrim parash ndaj një konvoji bankar ukrainas, i cili ishte bllokuar në mars me 82 milionë dollarë në para cash dhe ar.

Gjithashtu, në muajin qershor, Ministri i Marrëdhënieve Sociale, Zoltán Tarr, njoftoi se qeveria rrëzoi zyrtarisht ndalimin 9-mujor që administrata e Orbanit i kishte vendosur medieve ukrainase. Pas këtyre marrëveshjeve dypalëshe në qershor, të 27 shtetet anëtare të Bashkimit Evropian dhanë dritën e gjelbër për hapjen e grupit të parë të negociatave të anëtarësimit për Ukrainën dhe Moldavinë.