Deputeti i Partisë Demokratike, Eno Bozdo, ka kritikuar projektbuxhetin dhe paketën fiskale për vitin 2027, duke i cilësuar ato si dësh...
BOTA
I veshur si grua, 33-vjeçari ‘tradhtohet’ dhe arrestohet! Para agjentëve bën dëshminë tronditëse për numrin e vrasjeve, i treti në histori
PiranjatPërditësimi i fundit 17 September 2026, 21:29
Ai pothuajse ia kishte dalë, por një tatuazh e tradhtoi. Jordan Lopes da Silva, 33 vjeç, ishte maskuar si grua, duke vendosur një paruke, syze dielli femrash dhe duke lyer thonjtë me manikyr. Në krahë mbante një fëmijë dyvjeçar, i cili nuk ishte i afërm i tij.
Me këtë maskim, ai tentoi t’i shpëtonte policisë braziliane, e cila ishte në gjurmët e tij prej 48 orësh, pasi dyshohej se kishte kryer 16 vrasje brenda një periudhe prej tre muajsh. Pasi kishte kaluar kontrollet, 33-vjeçari dyshohet se ishte kthyer në banesën ku fshihej, kishte marrë një pistoletë dhe kishte lënë fëmijën.
Por kur doli sërish nga banesa, veshja dyshohet se i ishte zhvendosur, duke zbuluar një tatuazh. Burri u arrestua në Mulumbu, në shtetin Paraíba, në pjesën verilindore të Brazilit. Bashkë me të u vunë në pranga edhe dy persona të tjerë, të dyshuar për përfshirje në disa vepra penale të kryera në zonë.
Rrëfimi tronditës
Pas arrestimit, 33-vjeçari bëri një rrëfim që i la agjentët të habitur; ai nuk kishte kryer 16 vrasje, por 80 gjatë gjithë jetës së tij, me vrasjen e tij të parë kur ishte vetëm 13 vjeç. Numri ende nuk është konfirmuar.
Hetuesit po kryejnë kërkimet dhe verifikimet e nevojshme, por nëse kjo shifër rezulton e vërtetë, ai do të jetë një nga vrasësit serialë me numrin më të madh të viktimave në botë, krahas mjekut anglez Harold Shipman, me 218 viktima, dhe kolumbianit Luis Garavito, i njohur si “Bisha”, të cilit i atribuohen 138 vrasje.
“Është një numër shumë i lartë. Besojmë se, edhe nëse nuk është saktësisht shifra e deklaruar, mund të jetë gjithsesi shumë pranë saj”, deklaroi kreu i hetimit, Douglas Garcia, për Globo.com. Deri tani, rezulton se Jordan Lopes da Silva ka kaluar gjithsej rreth gjashtë vjet pas hekurave dhe ishte liruar në maj të këtij viti.
Viktimat e mundshme
Mes krimeve që i atribuohen 33-vjeçarit është edhe vrasja e dy tregtarëve, të ekzekutuar më 1 gusht në Rio Tinto, në bregdetin verior të Paraíba-s. Sipas hetuesve, në pritën ndaj tyre dyshohet se kanë marrë pjesë edhe katër persona të tjerë.
Policia po verifikon gjithashtu përfshirjen e tij në vrasjen e një vajze të re. Trupi i viktimës dyshohet se u gjet pasi vetë 33-vjeçari u tregoi agjentëve vendin ku ishte varrosur. Ky është një element që hetuesit duhet ta krahasojnë me provat dhe të dhënat e tjera të mbledhura.
Autoritetet braziliane dyshojnë gjithashtu për një lidhje mes Lopes da Silva dhe një organizate kriminale të krijuar në Rio de Janeiro dhe që vepron në Paraíba.
Pasi i shpëtoi një ndërhyrjeje të mëparshme të policisë në Rio Tinto, burri dyshohet se u strehua në një komunitet në Cabedelo, në zonën metropolitane të João Pessoa-s, e konsideruar një nga bazat e këtij grupi kriminal. “Jam një njeri i mirë, nuk jam kërcënim për askënd”, deklaroi 33-vjeçari brazilian, duke pretenduar se kishte vrarë vetëm kriminelë dhe se donte të ‘pastronte shoqërinë’. /PiranjatNews/
