16-vjeçari Arjon Xhezairi ka ndërruar jetë në Spitalin e Traumës në Tiranë, pasi nuk arriti t’u mbijetonte plagë...
BOTA
“Inteligjenca Artificiale mund të zhdukë njerëzimin brenda një dekade”/ Një tjetër ekspert jep alarmin pasi dorëhiqet nga Google DeepMind
PiranjatPërditësimi i fundit 15 September 2026, 18:17
Një tjetër ekspert në fushën e Inteligjencës Artificiale, dha alarmin të hënën në lidhje me inteligjencën artificiale, pasi më parë një tjetër ekspertoi paralajmëroi se teknologjia mund të “vrasë të gjithë njerëzit”. Ish-kërkues i Google DeepMind, argumenton se koha për të parandaluar një skenar të tillë mund të jetë duke mbaruar.
Shqetësimi publik për rreziqet e mundshme të Inteligjencës Artificiale është rritur pas deklaratave të kërkuesit të Anthropic, Jacob Coxon, i cili pasi dha dorëheqjen nga kompania, ndër të tjera tha se “njerëzit që po ndërtojnë Inteligjencën Artificiale besojnë sinqerisht se ajo mund të na vrasë të gjithëve deri në fund të kësaj dekade”. Shkencëtari i Anthropic, Evan Hubinger, komentoi më pas deklaratat e Coxon, duke thënë se ai kishte të drejtë dhe se, sipas vlerësimit të tij, ekziston një mundësi prej më shumë se 10% që Inteligjenca Artificiale të çojë në zhdukjen e të gjithë njerëzimit brenda dekadës së ardhshme.
Në të njëjtën linjë u shpreh edhe Bilal Chughtai, i cili njoftoi përmes platformës X largimin e tij nga Google DeepMind. “Kohët e fundit dhashë dorëheqjen nga Google DeepMind, ku punoja në kërkime mbi sigurinë dhe përafrimin e inteligjencës së përgjithshme artificiale (AGI)”, shkroi ai, duke shtuar: “Besoj sinqerisht se Inteligjenca Artificiale ka potencialin të na vrasë të gjithëve dhe se mund të na jetë duke na mbaruar koha për ta parandaluar këtë mundësi”. Chughtai, i cili kishte bashkëfirmosur punime kërkimore gjatë periudhës së tij në Google DeepMind, punonte si inxhinier kërkimor dhe u largua nga kompania në korrik të vitit 2026, sipas profilit të tij në LinkedIn.
Paralajmërimet për “garën” e AI-së
Paralajmërimet e fundit vijnë në një kohë kur po shtohen zërat, edhe brenda vetë industrisë, për rreziqet që lidhen me zhvillimin e pakontrolluar të sistemeve gjithnjë e më të fuqishme.
Drejtori ekzekutiv i Anthropic, Dario Amodei, u shpreh ditët e fundit në favor të ngadalësimit të ritmit të zhvillimit të sistemeve të avancuara të Inteligjencës Artificiale.
Qëndrimi i tij mori një mbështetje të pazakontë nga Elon Musk dhe drejtori ekzekutiv i OpenAI, Sam Altman, duke ndezur një debat të ri rreth të ashtuquajturit “AI doomerism” – pra pikëpamjes se zhvillimi i pakontrolluar i Inteligjencës Artificiale mund të çojë në pasoja katastrofike për njerëzimin.
Chughtai argumentoi se zhvillimi i sigurt i Inteligjencës Artificiale është i mundur, por do të kërkojë bashkëpunim dhe koordinim mes kompanive. “Duhet të shmangim këtë garë të furishme mes kompanive të Inteligjencës Artificiale”, deklaroi ai, duke shtuar: “Duhet ta përshtatim ritmin e zhvillimit të Inteligjencës Artificiale me një shpejtësi që shoqëria mund ta menaxhojë, në mënyrë që rreziqet e reja të mund të adresohen përpara se të shkaktojnë dëme ekstreme.”
Megjithatë, presidenti i SHBA-së, Donald Trump, i ka hedhur poshtë këto paralajmërime, duke e cilësuar në një postim në Truth Social si “mashtrim” thirrjen e industrisë së Inteligjencës Artificiale për vendosjen e rregullave mbi sektorin. /PiranjatNews/
