“Mos e prek Memaliajn!” Me këtë mesazh dhe pankarta në duar, banorë të Memaliajt dolën në aksin kryesor që l...
BOTA
VIDEO/ Kaos në aeroportin e Stambollit, mijëra udhëtarë të bllokuar! Mes tyre edhe shqiptarë
PiranjatPërditësimi i fundit 29 Mars 2026, 19:01
Një situatë shqetësuese po zhvillohet në aeroportin ‘Sabiha Gökçen International Airport’, ku mijëra udhëtarë, mes tyre edhe shqiptarë, kanë mbetur të bllokuar për orë të tëra pas anulimit masiv të fluturimeve. Një qytetar shqiptar ka denoncuar kaosin e krijuar në ambientet e aeroportit. Ai tregon se ka mbi 6 orë që pret, ndërsa askush nuk jep një përgjigje të qartë për situatën.
“Kaos në Stamboll, nuk jep njeri përgjigje. Janë anuluar të gjitha fluturimet, s’ka hotele bosh. U bënë 6 orë që presim. Po thonë për nesër në darkë në orën 24:00 ose të martën në 13:00. Flitet gjoja nga koha e keqe, por s’e dimë të vërtetën. Këtu janë më shumë se 20 mijë udhëtarë në pritje”, shprehet ai.
Pamjet e dërguara nga vendngjarja tregojnë një situatë të rënduar, me turma të mëdha njerëzish të grumbulluar në sallat e pritjes, ku mungesa e informacionit dhe alternativave ka shtuar tensionin.
Sipas raportimeve ndërkombëtare, shkaku kryesor i këtij kaosi lidhet me kushtet e këqija atmosferike që kanë goditur Stambollin, duke ulur ndjeshëm shikueshmërinë dhe duke detyruar autoritetet të vendosin kufizime në fluturime për dy ditë. Kompanitë ajrore si Pegasus Airlines dhe AJet kanë anuluar dhjetëra fluturime, ndërsa disa avionë janë detyruar të devijojnë drejt aeroporteve të tjera për shkak të mungesës së karburantit gjatë tentativave për ulje.
Autoritetet e aeroportit kanë konfirmuar se kufizimet do të vijojnë të paktën deri më 30 mars, duke paralajmëruar se anulime të tjera mund të ndodhin nëse moti nuk përmirësohet. Ndërkohë, situata nuk është e izoluar vetëm në Turqi. Probleme të ngjashme me anulime dhe vonesa janë raportuar edhe në aeroporte të tjera ndërkombëtare, duke prekur mijëra udhëtarë në disa vende.
Për momentin, udhëtarët mbeten në pritje të zhvillimeve të reja, ndërsa frustrimi dhe pasiguria rriten nga ora në orë në një nga aeroportet më të ngarkuara të rajonit.
