VIDEO/ Sherr i egër me karrige, grushte dhe shqelma mes turistëve

Një përleshje e dhunshme mes turistëve ka shpërthyer në ishullin e famshëm italian të Caprit, duke shkaktuar kaos dhe panik mes personave që ndodheshin në zonë.

Gjatë sherrit, personat e përfshirë kanë shkëmbyer grushte dhe shqelma, ndërsa në një moment janë përdorur edhe karriget. Pamjet e incidentit janë regjistruar nga dëshmitarët dhe videoja është përhapur me shpejtësi në rrjetet sociale.

Videoja është ripostuar edhe nga deputeti i Aleancës së të Majtës së Gjelbër, Francesco Emilio Borrelli, i cili e ka shfrytëzuar incidentin për të ngritur shqetësimin për nivelin e sigurisë në ishull gjatë orëve të natës.

Sipas Borrellit, banorë dhe dëshmitarë kanë denoncuar praninë e pamjaftueshme të forcave të rendit gjatë natës.

“Në Capri nevojiten urgjentisht më shumë kontrolle dhe më shumë siguri. Natën ka vetëm një patrullë për të gjithë ishullin. Kjo nuk është e drejtë”, deklaroi ai.

Pas ngjarjes ka reaguar edhe kryebashkiaku i Caprit, Paolo Falco, i cili tha se në ishull janë tashmë në fuqi masa sigurie. Sipas tij, policia bashkiake dhe forcat e tjera të sigurisë kryejnë kontrolle, ndërsa rreth 80 kamera me rezolucion të lartë monitorojnë territorin.

Incidenti ka sjellë edhe reagimin e prefektit të Napolit, Michele Di Bari, i cili dënoi kategorikisht dhunën dhe urdhëroi forcimin e mëtejshëm të mbikëqyrjes dhe kontrolleve në Capri.

Përleshja ka rikthyer kështu debatin mbi sigurinë gjatë natës në një prej destinacioneve turistike më të njohura dhe më të frekuentuara të Italisë./PiranjatNews/