Ambasadori i OSBE-së në Shqipëri, Michel Tarran, ka reaguar lidhur me protestat e dhunshme të zhvilluara në Tiranë dhe qytete t&e...
BOTA
Kishte si destinacion Belgjikën, konfiskohen në Peru 3.4 ton kokainë e fshehur në ngarkesë bananesh
PiranjatPërditësimi i fundit 7 December 2025, 15:28
Policia e Perusë ka konfiskuar 3,4 ton kokainë, e cila do të transportohej e fshehur në një ngarkesë me banane me destinacion Belgjikën.
“Si pjesë e një operacioni të fuqishëm kundër trafikut të drogës, Policia Kombëtare e Perusë konfiskoi 3.407 kilogramë kokainë hidroklorike në rajonin e Piura-s (në veri-perëndim të Perusë), duke parandaluar kështu dërgimin e saj jashtë vendit,” njoftoi Ministria e Brendshme.
Droga e konfiskuar vjen nga zona e madhe e kultivimit të kokës, e njohur me akronimin VRAEM (Lugina e lumenjve Apurímac, Ene dhe Mantaro), sipas kryetarit të përkohshëm të policisë, José Heri.
Gjatë operacionit të zhvilluar të mërkurën, policia konfiskoi një kamion që transportonte mbi 3.000 paketa kokainë drejt një depoje ku paketoheshin kuti me banane organike, të destinuara për eksport, rreth 100 kilometra larg portit të Paita-s, sipas autoriteteve.
Gjenerali Nilton Santos, kreu i shërbimit kundër drogës, deklaroi se operacioni u realizua me mbështetjen e Agjencisë Amerikane Kundër Drogës (DEA). Vlera e drogës së konfiskuar kap më shumë se 68 milionë dollarë ose rreth 58,4 milionë euro.
Sipas njoftimit të Presidencës së Perusë, pas kësaj ngarkese qëndron një organizatë kriminale që përfshin qytetarë peruanë, kolumbianë dhe evropianë, e cila planifikonte të dërgonte drogën në Belgjikë.
Sipas Kombeve të Bashkuara, Peruja, së bashku me Kolumbinë dhe Bolivinë, është ndër prodhuesit kryesorë të kokainës në botë. Autoritetet peruane njoftojnë se vendi prodhon rreth 400 tonë të kësaj droge çdo vit.
