Valëvitja e një flamuri shqiptar me simbole kombëtare në qytetin shqiptar të Gucisë, në Mal të Zi, është sho...
BOTA
Kreu i opozitës ruse largohet nga vendi pas presionit për të mos sfiduar Putinin
PiranjatPërditësimi i fundit 5 Gusht 2026, 11:54
Politikani opozitar rus Boris Nadezhdin ka njoftuar se është larguar nga Rusia, vetëm disa ditë pasi pezulloi përpjekjen për të kandiduar në zgjedhjet parlamentare të shtatorit, mes presionit në rritje nga autoritetet.
“Lajmi i mirë është se jam gjallë dhe i lirë. Por, për fat të keq, ende nuk jam në Rusi”, deklaroi Nadezhdin në një video të publikuar në Telegram, e regjistruar pranë Kullës Eiffel në Paris.
Nadezhdin, i cili është shprehur kundër luftës në Ukrainë, u gjobit në korrik me 1 mijë rubla për shfaqjen e simboleve të cilësuara “ekstremiste”. Më herët, autoritetet ruse e kishin shpallur “agjent të huaj”, status që e pengon të kandidojë për poste publike.
Ende nuk është bërë e qartë se kur dhe si ai ka arritur të largohet nga Rusia, pasi më herët kishte deklaruar se ishte ndaluar të largohej nga vendi.
Në videon e publikuar nga Parisi, Nadezhdin tha se do të vlerësojë situatën dhe do të vendosë se si do të vijojë jetën e tij. Ai premtoi se do të japë më shumë detaje për planet e ardhshme.
Opozitari rus u bë i njohur gjatë fushatës presidenciale të vitit 2024, kur tentoi të sfidonte Vladimir Putinin me një platformë kundër luftës në Ukrainë. Fushata e tij nuk u lejua të vazhdonte nga autoritetet zgjedhore.
Nadezhdin ka shërbyer më herët si këshilltar i ish-kryeministrit Boris Nemtsov dhe si ndihmës i ish-kryeministrit Sergei Kiriyenko. Ai ka qenë gjithashtu deputet i Dumës Shtetërore nga viti 1999 deri në vitin 2003.
Largimi i tij nga Rusia vjen në një kohë kur autoritetet kanë shtuar presionin ndaj figurave opozitare dhe kritikëve të Kremlinit.
