L
Një plagosje me thikë ka ndodhur rreth mesditës në Durrës, në zonën e Shkozetit. Një i ri, rreth 25 vjeç, &eum...
BOTA
Liban/ Hezbollahu hedh poshtë planin katërmujor të qeverisë për çarmatim: I shërben Izraelit
PiranjatPërditësimi i fundit 17 Shkurt 2026, 19:38
Organizata e armatosur Hezbollah ka hedhur poshtë vendimin e qeverisë së Libani për t’i dhënë ushtrisë një afat katërmujor për të vijuar me fazën e dytë të planit të çarmatimit, duke deklaruar se nuk do të pranojë një veprim që, sipas saj, “i shërben agresionit izraelit”.
Në gusht 2025, kabineti libanez ngarkoi ushtrinë me hartimin dhe nisjen e zbatimit të një plani për vendosjen e armëve të të gjitha organizatave të armatosura nën kontrollin e shtetit – një nismë që synon kryesisht çarmatosjen e Hezbollahut, pas luftës me Izraeli në vitin 2024.
Në shtator 2025, qeveria mirëpriti planin e ushtrisë për çarmatimin e organizatës shiite pro-iraniane, por pa përcaktuar një kalendar të qartë. Sipas Reuters, autoritetet paralajmëruan se aftësitë e kufizuara të ushtrisë dhe sulmet e vazhdueshme izraelite mund të pengojnë zbatimin e plotë të planit.
Sekretari i Përgjithshëm i Hezbollahut, Naim Qassem, deklaroi në një fjalim se “ajo që po bën qeveria libaneze në lidhje me çarmatimin është një gabim i madh sepse i shërben qëllimeve të agresionit izraelit”.
Ndërkohë, Ministri libanez i Informacionit, Paul Morkos, njoftoi pas mbledhjes së kabinetit se qeveria kishte shqyrtuar raportin mujor të ushtrisë dhe i kishte dhënë asaj një afat katërmujor për zbatimin e planit. Ai theksoi se afati mund të zgjatet në varësi të “aftësive të disponueshme, sulmeve izraelite dhe pengesave në terren”.
Deputeti i Hezbollahut, Hassan Fadlallah, reagoi ashpër duke deklaruar se organizata “nuk mund të jetë e butë”, duke lënë të kuptohet se e refuzon qasjen dhe afatin e vendosur nga qeveria.
Hezbollahu e cilësoi përpjekjen për çarmatim si “hap të gabuar”, ndërsa ministrat shiitë braktisën një mbledhje të kabinetit në shenjë proteste.
Nga ana tjetër, Izraeli ka deklaruar se çarmatosja e Hezbollahut mbetet një prioritet strategjik, duke argumentuar se armatimi i tij jashtë kontrollit shtetëror përbën kërcënim të drejtpërdrejtë për sigurinë izraelite. Zyrtarët izraelitë kanë theksuar se çdo plan duhet të zbatohet plotësisht dhe në mënyrë efektive, veçanërisht në zonat pranë kufirit, duke e konsideruar veprimtarinë ushtarake të vazhdueshme të Hezbollahut si shkelje të rezolutave ndërkombëtare.
