Rritja e numrit të turistëve gjatë sezonit veror është shoqëruar edhe me shqetësime për abuzimet me çmimet n&eu...
BOTA
Lufta dhe mungesa e kanaçeve krijojnë trendin më të çuditshëm në Indi
PiranjatPërditësimi i fundit 11 Maj 2026, 10:15
Mungesa e kanaçeve të aluminit në Indi, e shkaktuar nga problemet globale të furnizimit pas mbylljes së Ngushticës së Hormuzit, ka vështirësuar furnizimin me Diet Coke dhe e ka kthyer pijen në një fenomen mes të rinjve. Situata ka nxitur organizimin e festave pa alkool me tematikë Diet Coke, duke reflektuar popullaritetin në rritje të pijeve “zero sugar” dhe kulturën e re sociale të Gjeneratës Z.
Dashuria për Diet Coke u kthye në një ide origjinale për Ishika Gupta-n, një 25-vjeçare nga Nju Delhi që punon në marketing dhe dizajn. Frika se pija e saj e preferuar mund të zhdukej nga tregu për shkak të mungesave e shtyu të organizonte një festë të dedikuar tërësisht Diet Coke.
Problemet nisën pasi mbyllja e Ngushticës së Hormuzit krijoi pasoja në ekonominë globale dhe ndërpreu zinxhirët e furnizimit në Azi. Një nga efektet më të pazakonta ishte mungesa e kanaçeve të aluminit në Indi. Furnitorët thanë për Reuters se disa porosi nuk po realizoheshin, pasi rajoni i Gjirit Persik përfaqëson rreth 9% të prodhimit global të aluminit. Ndryshe nga shumë vende të tjera, Diet Coke në Indi shitet vetëm në kanaçe alumini dhe jo në shishe plastike.
Ajo që nisi si një shaka mes miqsh u kthye shpejt në një trend viral. Gupta mendonte se në festë do të merrnin pjesë vetëm disa persona, por biletat u shitën menjëherë dhe rreth 150 të rinj morën pjesë në eventin e zhvilluar më 26 prill.
Pjesëmarrësit u shfaqën me veshje me tematikë Coca-Cola, kërcyen nën ritmet e muzikës house dhe pop dhe krijuan përzierje të ndryshme me Diet Coke, të frymëzuara nga videot e Dua Lipës në TikTok, ku këngëtarja shton lëng turshie dhe speca jalapeño në pije.
Në festë nuk kishte alkool. Në vend të koktejve tradicionalë, organizatorët krijuan një menu të quajtur “Coke-tail”, me kombinime të ndryshme të Diet Coke dhe përbërësve të tjerë.
Sipas Gupta-s, të rinjtë në Indi po orientohen gjithnjë e më shumë drejt pijeve pa sheqer dhe aktiviteteve sociale pa alkool. Një studim i vitit 2023 nga Këshilli Indian për Kërkime Mjekësore tregoi se pothuajse 10% e popullsisë së rritur në Indi është diabetike, gjë që ka rritur interesin për alternativat “zero sugar”.
Ajo tregoi se në shumë festa shtëpie, pijet tradicionale si Coca-Cola apo Sprite po zëvendësohen me versione pa sheqer. Pak para shpërthimit të luftës në Iran, Gupta kishte hapur edhe një faqe në Instagram kushtuar Diet Coke. Ajo e konsideron gjithë situatën si një “përputhje kozmike”, pasi festa u organizua pikërisht në momentin kur pija po bëhej e vështirë për t’u gjetur.
Edhe pse Diet Coke ishte zhdukur nga shumë platforma online të shpërndarjes së ushqimeve, lokali ku u mbajt festa arriti të siguronte furnizime përmes distributorëve.
Fenomeni po tërheq gjithnjë e më shumë vëmendje në mesin e të rinjve indianë. Në Gurugram, pranë Nju Delhit, restoranti Marièta kontaktoi Gupta-n për të organizuar një festë të dytë. Shruti Sharma, drejtuese marketingu në restorant, tha se të rinjtë shpesh tërhiqen nga gjërat që bëhen të rralla dhe arrijnë të gjejnë argëtim e kreativitet edhe në situata të pazakonta.
Biletat për eventin kushtojnë rreth 16 dollarë dhe përfshijnë dy kanaçe Diet Coke, ushqime të lehta, përzierës dhe dekorime me tematikë Coca-Cola. Festa e dytë do të shërbejë gjithashtu si një seancë dëgjimi për albumin e ri të Drake, “Iceman”. Ashtu si eventi i parë, edhe kjo festë do të zhvillohet pa alkool./Përktheu Piranjat News
