Dy telefona “Iphone 17” dhe një telefon “Iphone 13”, janë sekuestruar nga prokuroria e Durrësit, me shpresën e zbard...
BOTA
“Luftojmë kundër punës së detyruar”/ SHBA vendos tarifa të reja ndaj 60 partnerëve tregtarë, përfshihen BE, Kinën, Kanadanë dhe Japoninë
PiranjatPërditësimi i fundit 24 Korrik 2026, 13:44
Shtetet e Bashkuara kanë vendosur tarifa të reja ndaj 60 partnerëve të tyre kryesorë tregtarë, duke argumentuar se këto vende nuk kanë ndërmarrë masa të mjaftueshme për të ndaluar importin e mallrave të prodhuara me punë të detyruar.
Tarifat, të cilat variojnë nga 10% në 12.5%, hynë në fuqi të premten dhe prekin partnerë të rëndësishëm ekonomikë si Bashkimi Evropian, Kina, Mbretëria e Bashkuar, Kanadaja, Japonia dhe India. Masat zëvendësojnë taksën e përkohshme prej 10% mbi importet, e cila ishte vendosur në fillim të këtij viti.
Vendimi përbën përshkallëzimin më të fundit të politikës tregtare të administratës së presidentit Donald Trump, e cila synon të përdorë tarifat si mjet presioni për të luftuar punën e detyruar dhe për të mbrojtur interesat ekonomike amerikane.
Përfaqësuesi i Tregtisë i SHBA-së, Jamieson Greer, deklaroi se tarifat do të ndihmojnë në korrigjimin e një praktike që, sipas tij, përbën njëkohësisht shkelje të të drejtave të njeriut dhe deformim të konkurrencës në tregtinë ndërkombëtare.
Sipas Zyrës së Përfaqësuesit të Tregtisë, tarifat mbulojnë 60 partnerët kryesorë tregtarë të SHBA-së, të cilët përfaqësojnë rreth 99.4% të importeve amerikane. Vendet që kanë marrë angazhime për të ndaluar importet e prodhuara me punë të detyruar do t’i nënshtrohen tarifës 10%, ndërsa ato që nuk kanë ndërmarrë hapa të tillë do të përballen me tarifën më të lartë prej 12.5%.
Administrata Trump e konsideron ndalimin e importeve të prodhuara me punë të detyruar një element kyç të marrëveshjeve tregtare me partnerët ndërkombëtarë. Deri tani, sipas Uashingtonit, dhjetë vende kanë pranuar të zbatojnë ndalime të tilla.
Ekspertët paralajmërojnë se tarifat e reja mund të rrisin kostot për bizneset dhe konsumatorët amerikanë, ndërsa shumë vende pritet të kërkojnë tregje alternative për të ulur varësinë nga ekonomia amerikane.
Vendimi ka shkaktuar reagime të menjëhershme. Brazili e cilësoi masën “arbitrare” dhe “të pajustifikuar”, duke paralajmëruar kundërmasa sipas parimit të reciprocitetit. Japonia shprehu keqardhje për tarifat, ndërsa Australia i konsideroi ato të pajustifikuara dhe premtoi se do të vazhdojë përpjekjet diplomatike për heqjen e tyre.
Kina, nga ana tjetër, hodhi poshtë akuzat për përdorimin e punës së detyruar, duke deklaruar se çështja po përdoret si justifikim për presion politik dhe ekonomik. Megjithatë, organizata ndërkombëtare të të drejtave të njeriut vijojnë të raportojnë raste të punës së detyruar, veçanërisht në rajonin e Xinjiangut.
Tarifat e reja janë pjesë e strategjisë së vazhdueshme të Donald Trump për përdorimin e detyrimeve doganore si instrument në politikën tregtare dhe në marrëdhëniet me partnerët ekonomikë të SHBA-së.
