Makina përplas disa qytetarë në një kafene, dy të plagosur rëndë në Torino

Një aksident i rëndë ka tronditur pasditen e kësaj të hëne zonën e Jouvenceaux, në Sauze d’Oulx, në provincën e Torinos.

Një automjet ka dalë nga rruga dhe ka përplasur disa persona që ndodheshin ulur jashtë një bari. Si pasojë e përplasjes, një burrë dhe një grua, të dy mbi 70 vjeç, kanë mbetur të plagosur.

Ngjarja ndodhi pak para orës 18:00, ndërsa në vendngjarje mbërritën menjëherë ekipet e emergjencës dhe shërbimi rajonal i shpëtimit ajror.

Pas marrjes së ndihmës së parë dhe stabilizimit të gjendjes, dy të plagosurit u transportuan me helikopter drejt spitalit CTO në Torino, ku po marrin trajtim mjekësor.

Autoritetet kanë nisur verifikimet për të zbardhur rrethanat dhe shkaqet e aksidentit.