Mbetën të bllokuar në det për më shumë se 24 orë, shpëtohen pese persona në Indonezi

Pesë persona, mes tyre edhe një vajzë 7-vjeçare, janë shpëtuar pasi kaluan më shumë se 24 orë në det, pas mbytjes së një anijeje pranë ishullit Sulawesi në Indonezi. Anija, e cila transportonte 70 pasagjerë, u fundos duke shkaktuar të paktën një viktimë, ndërsa dhjetëra persona rezultojnë ende të zhdukur dhe kërkimet për ta vijojnë.

Mediat e huaja bëjnë me dije se të mbijetuarit u thanë ekipeve të shpëtimit se ishin me grupin e njerëzve, gjurmët e të cilëve ishin humbur, përpara se të ndaheshin prej tyre nga erërat e forta.

"Pasi anija u fundos, ata mbijetuan duke përdorur çdo pajisje të disponueshme ose mjete të improvizuara për të lundruar",tha Muhammad Arif Anwar, kreu lokal i operacioneve të kërkim-shpëtimit.

Shkaku i fundosjes ishte një defekt në motorin e anijes. Varka po lundronte pranë Selayar, një ishull i vogël në jug të Sulawesit. Aksidentet detare janë të zakonshme në Indonezi, një vend i Azisë Juglindore me rreth 17,000 ishuj, kryesisht për shkak të mungesës së masave të rrepta të sigurisë dhe kushteve të këqija të motit. Tre turistë spanjollë vdiqën në fund të dhjetorit kur varka e tyre u mbyt në brigjet lindore të Indonezisë.