Policia e Durrësit ka arrestuar tre persona dhe ka shpallur në kërkim dy të tjerë, të cilët dyshohen për trafikimin t&...
BOTA
Mbi 100 ish-diplomatë britanikë e francezë kërkojnë masa ndaj Izraelit: Palestina po zhduket
PiranjatPërditësimi i fundit 22 Gusht 2026, 17:20
Më shumë se 100 ish-diplomatë të lartë nga Britania e Madhe dhe Franca i kanë bërë thirrje dy qeverive të ndërmarrin masa konkrete ndaj Izraelit, duke paralajmëruar se zgjidhja me dy shtete po minohet dhe se situata në territoret palestineze po përkeqësohet me shpejtësi.
Apeli i përbashkët është nënshkruar nga 52 ish-diplomatë francezë dhe 50 ish-ambasadorë britanikë, mes tyre figura që kanë shërbyer në Lindjen e Mesme dhe në Kombet e Bashkuara. Në letrën drejtuar presidentit francez Emmanuel Macron dhe kryeministrit britanik Andy Burnham, ata kërkojnë vendosjen e kufizimeve tregtare, ndalimin e transferimeve të armëve dhe bashkëpunimit ushtarak, si dhe sanksione ndaj kompanive dhe individëve të lidhur me vendbanimet izraelite në territoret palestineze të okupuara.
Sipas nënshkruesve, qeveria izraelite po ndjek politika që shkatërrojnë themelet territoriale dhe politike të një shteti palestinez. Ata argumentojnë se njohja e Palestinës nga Britania dhe Franca gjatë vitit 2025 rrezikon të mbetet një akt simbolik nëse nuk shoqërohet me masa që ushtrojnë presion real diplomatik dhe ekonomik.
Një ndërhyrje e pazakontë diplomatike
Mediat franceze e cilësojnë letrën si një nga ndërhyrjet më të drejtpërdrejta të viteve të fundit nga ish-anëtarë të diplomacisë britanike dhe franceze, institucione që tradicionalisht kanë preferuar qëndrime më të rezervuara në publik.
Mes firmëtarëve britanikë janë Jeremy Greenstock dhe Emyr Jones Parry, ish-ambasadorë në OKB, si edhe Edward Chaplin, ish-drejtor për Lindjen e Mesme në Foreign Office. Nga pala franceze spikasin Patrice Paoli, ish-drejtor për Lindjen e Mesme, dhe Stanislas de Laboulaye, ish-konsull i përgjithshëm i Francës në Jerusalem.
Shumë prej diplomatëve kanë përfaqësuar vendet e tyre në shtete kyçe të rajonit, përfshirë Egjiptin, Iranin, Izraelin, Sirinë, Turqinë, Arabinë Saudite, Katarin dhe Bahreinin, duke i dhënë letrës një peshë të veçantë diplomatike.
