Në Shqipëri, në vitin 2024, në institucionet publike të shërbimit spitalor, ishin në dispozicion 8,911 shtretër, sipas...
BOTA
Më shumë se dy javë nga tërmetet vdekjeprurëse në Venezuelë, rëndohet bilanci i viktimave, shkon në 4.490 numri i personave që humbën jetën
PiranjatPërditësimi i fundit 13 Korrik 2026, 09:28
Bilanci i viktimave nga dy tërmetet shkatërruese që goditën Venezuelën më 24 qershor ka arritur në 4,490 të vdekur, ndërsa ekipet e shpëtimit vazhdojnë kërkimet mes rrënojave.
Lajmi u bë i ditur nga presidenti i Parlamentit të Venezuelës, Jorge Rodríguez, i cili tha se operacionet e kërkim-shpëtimit vijojnë edhe pas më shumë se dy javësh nga fatkeqësia.
Sipas autoriteteve, numri i të plagosurve ka mbetur në 16,740, ndërsa 6,462 persona janë nxjerrë të gjallë nga rrënojat.
Pasojat humanitare janë të rënda. Të dhënat zyrtare tregojnë se 17,907 persona kanë mbetur pa banesë, ndërsa rreth 20,000 të tjerë janë strehuar në kampe të përkohshme në Karakas dhe zona të tjera të prekura.
Dy tërmetet, me magnitudë 5.2 dhe 5.7 të shkallës Rihter, shkatërruan plotësisht 190 ndërtesa dhe dëmtuan rëndë mbi 856 të tjera, duke lënë mijëra familje pa strehë.
Ndërkohë, qeveria venezueliane ka intensifikuar përpjekjet për të siguruar fonde për përballimin e krizës. Presidentja Delcy Rodríguez i ka bërë thirrje Fondit Monetar Ndërkombëtar (FMN), Bankës së Anglisë dhe Shteteve të Bashkuara të lirojnë asetet financiare të vendit për të financuar operacionet e emergjencës dhe rindërtimit.
Sipas autoriteteve, rreth 4.2 miliardë dollarë në ar venezuelian mbeten të bllokuara në Bankën e Anglisë, ndërsa afro 5 miliardë dollarë në Të Drejta Speciale të Tërheqjes (SDR) pranë FMN-së nuk janë vënë në dispozicion të Karakasit që prej vitit 2021.
Në të njëjtën kohë, një grup ekonomistësh ndërkombëtarë po i kërkon Shteteve të Bashkuara të lehtësojnë sanksionet ekonomike ndaj Venezuelës, duke argumentuar se ato po vështirësojnë përballimin e pasojave të katastrofës natyrore.
