Meloni: Nuk më pëlqen ideja e një Italie të nënshtruar

Kryeministrja italiane, Giorgia Meloni, ka hedhur poshtë idenë e një “Italie të nënshtruar” dhe ka theksuar nevojën që vendi i saj të jetë “në tryezën e atyre që përcaktojnë drejtimin”.

“Nuk më pëlqen ideja e një Italie të nënshtruar, e një Italie që e sheh veten si më pak të rëndësishme se të tjerët”, tha Meloni për gazetën New York Times, duke theksuar synimin e saj për të realizuar “revolucionin më të madh që mund të ndodhë në këtë vend, një revolucion të krenarisë”.

Komentet e saj u bënë gjatë një diskutimi për marrëdhëniet me presidentin amerikan, Donald Trump, raportet e të cilit me udhëheqësit evropianë janë tensionuar për disa çështje, kryesisht për Grenlandën dhe rolin e bllokut brenda NATO-s.

Meloni dhe Trump në përgjithësi kanë ruajtur marrëdhënie të ngushta, por tensionet janë shfaqur pasi Trump kritikoi Papa Leonin dhe gjithashtu, sipas raportimeve, sugjeroi se Meloni i ishte “përgjëruar” për të bërë një fotografi së bashku në samitin e Grupit të Shtatë (G7) në Francë.

“Është e qartë se me Donald Trumpin besoja se gjërat do të ishin më të lehta”, tha Meloni, duke përmendur “përputhjen” e qëndrimeve të tyre për disa çështje, përfshirë emigracionin.

“Gjërat dolën ndryshe”, shtoi ajo.

Meloni tha se ajo dhe Trump nuk kishin biseduar prej disa javësh, pasi ajo u bë një nga udhëheqëset e para evropiane që reagoi publikisht ndaj tij. Sipas raportimeve, ajo e konsideroi kritikën e Trumpit ndaj Papës si një vijë të kuqe.

“Vazhdoj të besoj se uniteti i Perëndimit është diçka shumë e rëndësishme. Strategjinë italiane nuk e përcaktoj në bazë të marrëdhënieve të mia personale”, tha më tej Meloni.

E pyetur nëse ajo dhe Trump do të bisedonin pas pushimeve verore, Meloni u përgjigj: “Epo, do të shohim”.

Meloni bëri thirrje gjithashtu për një qasje të vendosur dhe pragmatike për të rritur respektin ndaj Italisë në arenën globale.

Ajo tha se Italia duhet të ndalojë së vepruari si “rrota rezervë e Francës dhe Gjermanisë” dhe në vend të kësaj të jetë “në tryezën e atyre që përcaktojnë drejtimin”.

Ajo theksoi gjithashtu rëndësinë e stabilitetit, duke e përshkruar atë si “jo një pikëmbërritjeje, por një pikënisjeje”.

“Mendoj se ajo që më solli këtu (në zyrën e saj në Palazzo Chigi) ishte guximi për të qëndruar në anën e parehatshme të historisë. Të zgjedhësh të shkosh kundër rrymës”, tha Meloni.