Mesdheu po përvëlohet! Eksperti evropian tregon si do të ‘tropikalizohet’ klima në të ardhmen!

Një nga verat më të nxehta të regjistruara ndonjëherë nuk mund të mos i jepte një goditje të fortë edhe Mesdheut. Sipas të dhënave të Copernicus, programi evropian për vëzhgimin dhe monitorimin e Tokës, në brigjet evropiane dhe veçanërisht në Mesdheun perëndimor, temperaturat sipërfaqësore të detit kanë arritur rekorde absolute: deri në 6 gradë më të larta në qershor.

Edhe korriku nuk ka qenë shumë më mirë, pasi në Mesdhe është regjistruar një temperaturë mesatare prej 27 gradësh, më e larta e regjistruar ndonjëherë për këtë muaj.

Me pak fjalë, ujërat tona po bëhen gjithnjë e më të nxehta dhe pasojat për kafshët dhe organizmat që jetojnë në det, por edhe për ne njerëzit, janë dhe do të jenë shqetësuese.

Një shembull? “Prania e një sasie më të madhe uji në atmosferë, e cila është gati të bjerë si reshje, çon në ngjarje me reshje më intensive”, shpjegon për Tgcom24 Enrico Scoccimarro, shkencëtar i lartë në Qendrën Euro-Mesdhetare për Ndryshimet Klimatike (CMCC) dhe drejtor i divizionit të kërkimit mbi “Ndryshueshmërinë dhe Parashikimin Klimatik” (CLIVAP).

Ai shton: “Përveç humbjes së faunës dhe florës lokale për shkak të stresit termik, speciet e reja që hyjnë në këtë ekosistem janë në gjendje të zëvendësojnë speciet që kanë ekzistuar më parë. Kjo sjell humbjen e specieve endemike.”

Në përgjithësi, e ardhmja nuk duket shumë premtuese: “Temperatura mesatare globale do të vazhdojë të rritet në vitet e ardhshme, në një masë më të madhe ose më të vogël, në varësi të skenarëve të emetimeve të gazeve serrë.” Dhe ne do të duhet të kuptojmë se si të përshtatemi.

Çfarë kuptojmë me fjalën “tropikalizim” të Mesdheut?

Në fakt, kjo është një fjalë e veçantë dhe duhet të kemi kujdes me përdorimin e saj. Mesdheu nuk po bëhet tropikal. Po ndodhin ndryshime të tilla që Mesdheu po pushon së funksionuari si një det i butë/temperuar. Termi “tropikalizim” përdoret më shumë për të përshkruar pasojat biologjike të këtyre ndryshimeve.

Pse Deti Mesdhe është veçanërisht i ndjeshëm ndaj ngrohjes globale?

Mesdheu është një basen gjysmë i mbyllur dhe gjithashtu relativisht i cekët në krahasim me një oqean. Thellësia mesatare e tij është më pak se gjysma e asaj të Oqeanit Atlantik, për shembull.

Deti ynë ka tendencë të akumulojë nxehtësinë më shpejt sesa oqeanet, si Atlantiku apo Paqësori. Edhe pozicioni i tij është i veçantë: ai ndodhet në një zonë kalimtare midis qarkullimit atmosferik të gjerësive mesatare dhe qelizës së Hadley-t, një sistem i madh i qarkullimit atmosferik që gjendet në zonat tropikale të Tokës. /PiranjatNews/