Ilir Meta ka reaguar përmes një postimi në Facebook lidhur me konfliktin mes GJKKO dhe Dhomës Kombëtare të Avokatisë, duke pr...
BOTA
Ministri gjerman i Financave: Lufta në Iran kërcënim serioz për ekonominë botërore
PiranjatPërditësimi i fundit 18 May 2026, 08:21
Ministrat e Financave të G7‑së mblidhen për dy ditë në Paris. Në qendër të diskutimeve pritet të jenë pasojat e luftës në Iran, e cila sipas ministrit gjerman të Financave, Klingbeil, po dëmton ekonominë botërore.
Ministri gjerman i Financave, Lars Klingbeil, ka paralajmëruar për pasojat globale ekonomike të luftës në Iran. “Kjo luftë po dëmton masivisht zhvillimin ekonomik”, deklaroi politikani i SPD‑së para nisjes për në takimin e ministrave të Financave të vendeve të G7‑së në Paris. Duhet bërë gjithçka për t’i dhënë fund në mënyrë të qëndrueshme konfliktit dhe për të garantuar rrugët e lira detare.
G7 – një aleancë informale e vendeve kryesore industriale perëndimore – konsiderohet si kuadri i duhur për të diskutuar me SHBA‑në dhe shtete të tjera mbi çështjet urgjente botërore. Evropa në këtë drejtim mbështetet te bashkëpunimi në vend të konfrontimit, si dhe te tregtia e hapur. Lufta në Iran dhe bllokada e Ngushticës së Hormuzit përbëjnë “një kërcënim serioz për ekonominë botërore”, theksoi Klingbeil.
Trump kërcënon sërish Iranin me shkatërrim SHBA‑ja dhe Izraeli nisën më 28 shkurt sulmet ushtarake kundër Iranit. Regjimi në Teheran reagoi me sulme ajrore ndaj Izraelit, disa vendeve të Gjirit dhe objektivave amerikane në rajonin e Gjirit – si dhe me bllokimin e Ngushticës së Hormuzit, një prej rrugëve më të rëndësishme detare të tregtisë në botë. Aktualisht në luftën në Iran është në fuqi një armëpushim. Megjithatë, ende nuk ka një zgjidhje të qëndrueshme për konfliktin dhe pasojat e rënda ekonomike, që lidhen me të. Presidenti amerikan Donald Trump e kërcënoi sërish regjimin me fjalë të ashpra. Nëse Irani nuk lëviz drejt marrëveshjes, “nga ata nuk do të mbetet më asgjë”, shkroi ai në platformën e tij Truth Social.
Çështja e lëndëve të para: “të përgatitur për krizat” Në Grupin e G7-s bëjnë pjesë Gjermania, Franca, Britania e Madhe, Italia, Japonia, Kanadaja dhe SHBA‑ja. Në takimin e G7‑së, që zhvillohet të hënën dhe të martën në Paris, pritet që në qendër të jenë pasojat ekonomike të konfliktit në Lindjen e Mesme dhe ndikimi i mundshëm në tregtinë botërore.
Një temë tjetër është mbështetja për Ukrainën. Gjithashtu do të diskutohen pabarazitë në tregtinë globale, financimi i vendeve në zhvillim, si dhe masat kundër financimit të terrorizmit dhe krimit të organizuar.
Ministri gjerman i Financave, Klingbeil u shpreh para takimit të G7-s, se krizat aktuale tregojnë se Gjermania dhe Evropa duhet të bëhen më të pavarura dhe më rezistente ndaj krizave, sidomos në fushën e lëndëve të para, energjisë dhe zinxhirëve të furnizimit. Për këtë arsye, në Paris do të zhvillohen bisedime edhe me ministrat e Financave nga Brazili, India, Koreja e Jugut dhe Kenia.
Pavarësisht fokusit te Lindja e Mesme, lufta agresore e Rusisë kundër Ukrainës nuk duhet të dalë nga vëmendja, tha Klingbeil. Financimi i mbrojtjes së Ukrainës mbetet i garantuar nga G7 dhe BE‑ja. Për të çuar marrëdhëniet ekonomike dypalëshe në një nivel të ri, ai do të nënshkruajë në Paris me homologun e tij ukrainas, Serhij Martschenko, një marrëveshje për shmangien e tatimit të dyfishtë. Kjo pritet të forcojë shkëmbimin ekonomik dhe të krijojë siguri juridike për periudhën pas luftës, si dhe për rindërtimin./DW
