Avokati Arben Llangozi ka publikuar një video sipas të cilit, drejtori i AMP-së në Vlorë, Genci Kolgjini përdor fjalë të...
BOTA
Ministri gjerman i Jashtëm: SHBA-ja dhe Irani duhet të zgjedhin dialogun, jo përshkallëzimin
PiranjatPërditësimi i fundit 9 Korrik 2026, 15:27
Ministri i Jashtëm gjerman Johann Wadephulu bëri thirrje SHBA-së dhe Iranit që të fillojnë negociatat për t'i dhënë fund luftës. "Të dyja palët tani duhet të angazhohen", tha Ministri në një intervistë me transmetuesin publik ARD. Sipas tij, si njerëzit ashtu edhe ekonomia botërore po vuajnë për shkak të konfliktit të vazhdueshëm.
"Nuk e di se çfarë tjetër mund të bombardojë SHBA-ja në Iran - shumë gjëra janë shkatërruar tashmë. Gjithashtu nuk e shoh se çfarë kuptimi ka që Irani të vazhdojë me bllokadën".
Kjo është një thirrje e përgjithshme "për të gjithë që t'i thërrasin arsyes dhe të fillojnë të bisedojnë mes tyre".
"Deklarata shqetësuese" të Trump
Duke folur për samitin e NATO-s në Ankara, Wadephul vlerësoi se Aleanca është "më e fortë se kurrë". Ai e shpjegoi këtë me pranimin e Suedisë dhe Finlandës.
Duke iu referuar kritikave të ashpra dhe kursit politik të Presidentit të SHBA-së Donald Trump, ai pranoi se ka pasur "deklarata shqetësuese".
Megjithatë, ai theksoi se pjesëmarrësit në bisedimet e brendshme ishin të bashkuar. "Në të gjitha selitë dhe në të gjitha diskutimet politike brenda NATO-s, ne ende i shohim amerikanët si partnerë shumë të besueshëm", tha ai.
Roli udhëheqës i Gjermanisë Duke folur për rritjen e shpenzimeve të mbrojtjes, e cila po e rëndon gjithnjë e më shumë buxhetin e shtetit, politikani i CDU-së tha se Gjermania po bën atë që pritet prej saj.
"Ne po marrim një rol udhëheqës. Ne jemi vendi më i fortë, vendi më i madh dhe vendi më i fuqishëm financiarisht. Kjo është arsyeja pse po e udhëheqim këtë proces", tha ai.
Në të njëjtën kohë, Ministri kritikoi vendet e tjera evropiane që nuk po i rrisin shpenzimet e mbrojtjes në të njëjtën masë. Wadephul tha se nevojitet një shpërndarje ndryshe e barrës në Evropë.
"Jo të gjithë mund të mbështeten gjithmonë te Gjermania, shtetet baltike, Polonia, vendet skandinave dhe Holanda - të cilat japin pjesën më të madhe të mbështetjes për Ukrainën - për të bërë gjithçka vetë, vetëm sepse janë më afër Ukrainës. Kjo është arsyeja pse ne do t'u kërkojmë edhe të tjerëve të bëjnë më shumë", theksoi ai.
"Një shenjë e qartë mbështetjeje për Kievin"
Wadephul vlerësoi veçanërisht vendimet e samitit të NATO-s për mbështetjen e Ukrainës. "Suksesi i madh i këtij samiti është se ne kemi siguruar 140 miliardë. Kjo është një shenjë e qartë mbështetjeje për Kievin”, nënvizoi Wadephul.
Ky është gjithashtu një mesazh për Moskën që të ulet në tryezën e negociatave. "Mendoj se jemi në një fazë vendimtare të luftës. Sidoqoftë, ne kemi bërë gjithçka për të krijuar kushtet për negociata”, përfundoi Ministri i Jashtëm gjerman Wadephul./DW
