Mojtaba Khamenei "rishfaqet" me një mesazh për kohezionin social

Udhëheqësi suprem i Iranit u shfaq në skenë me një mesazh të gjatë për “Javën e Qeverisë”, i cili, përveç çështjeve rutinë, përmbante edhe disa referenca lidhur me krizën me SHBA. Mojtaba Khamene nuk është shfaqur publikisht prej saktësisht gjashtë muajsh, që nga dita kur filloi sulmi i SHBA-së dhe Izraelit ndaj Iranit. Ka shumë gjasa që ai të jetë plagosur në fillim të sulmit, por nuk dihet se në çfarë gjendjeje ndodhet.

Mesazhe të këtij lloji janë mënyra e vetme indirekte përmes së cilës ai komunikon me iranianët dhe me komunitetin ndërkombëtar. Duke falënderuar të gjithë punonjësit e sektorit publik për përkushtimin e tyre, ai thekson se ata vazhdojnë të kryejnë detyrat e tyre pavarësisht «planeve të armikut amerikano-sionist dhe intensifikimit të sanksioneve dhe bllokadës detare».

Më pas, ai i referohet popullit iranian dhe qëndrimit të tij: «Gjatë gjashtë muajve të fundit, ai ka treguar forcën e tij të vërtetë në fusha të ndryshme të luftës së shenjtë kundër armikut, përmes pranisë së tij në fushën e betejës, si dhe përmes unitetit, solidaritetit dhe kohezionit të tij. Ai meriton dhe ka të drejtë të ndiejë mbështetjen e autoriteteve dhe institucioneve përgjegjëse të Republikës Islamike».

Megjithatë, në mesazh ka edhe referenca indirekte për pasojat e konfliktit të armatosur.

Siç shpjegon Mojtaba Khamenei: «Duhet t'i kushtohet vëmendje serioze zinxhirit të sfidave ekonomike dhe atyre që lidhen me jetesën, si inflacioni, papunësia, kontrolli i çmimeve dhe i tregut të mallrave dhe shërbimeve». Ai gjithashtu përcjell një mesazh në favor të prodhimit vendas, i cili kompenson importet.

«Natyrisht, nxitja e prodhimit, paralelisht me kontrollin e importeve dhe çmimeve, mund të çojë në tkurrjen e pikave të errëta që shfaqen në peizazhin ekonomik të vendit, si dhe në zvogëlimin gradual të tyre, derisa ato të zhduken plotësisht», vijon ai në mesazhin e tij.

Një rëndësi të veçantë i kushton kohezionit social, duke pasur parasysh se SHBA-ja dhe Izraeli u përpoqën të shfrytëzonin çdo lloj proteste, por pa rezultat: «Ndër çështjet themelore të vendit, të cilat duhet të mbeten gjithmonë në qendër të vëmendjes së qeverisë, drejtuesve të saj, zyrtarëve dhe të gjitha institucioneve qeveritare, është përkushtimi ndaj unitetit dhe kujdesi për kohezionin social. Çdo veprim në cilindo prej sektorëve kryesorë – kulturor, social, politik, të sigurisë dhe ekonomik – duhet të ndërmerret duke i kushtuar vëmendjen e duhur dimensionit të veçantë të kohezionit social», thotë ai.

Mojtaba Khamenei e përfundon mesazhin e tij duke shkruar se zbatimi i programeve qeveritare do të sjellë «një Iran gjithnjë e më të fuqishëm». /PiranjatNews/