Nga një bast mes miqsh në udhëtimin e jetës! Burri që po ecën prej 27 vitesh për të përshkuar botën

Ajo që nisi si një bast mes miqsh në një mbrëmje me birrë u shndërrua në një nga aventurat më të jashtëzakonshme të kohëve moderne. Britaniku Karl Bushby, ish-parashutist i ushtrisë britanike, prej 27 vitesh po ecën në këmbë rreth botës, duke iu afruar më në fund destinacionit të tij. Në vitin 1998, Bushby u nis nga Punta Arenas në Kilin jugor me synimin për të mbërritur në qytetin e tij të lindjes, Hull, në Angli. Ai e quajti ekspeditën “Mission Goliath”, një udhëtim prej rreth 50 mijë kilometrash, të cilin fillimisht mendonte se do ta përfundonte brenda 12 vitesh.

Që në nisje, ai vendosi dy rregulla të panegociueshme: të mos përdorte asnjë mjet mekanik transporti për të vazhduar udhëtimin dhe të mos kthehej në shtëpi derisa ta përfundonte misionin. Sot, në moshën 57-vjeçare, Bushby ka përshkuar shkretëtira, xhungla, male dhe tundra, ka kaluar të gjithë kontinentin amerikan, Ngushticën e Beringut, rajonin e Darienit mes Panamasë dhe Kolumbisë, si edhe ka udhëtuar nëpër Rusi, Azi dhe Evropë.

Gjatë rrugës ai është përballur me vështirësi të shumta. Në një rast, pësoi një dëmtim të rëndë në kyçin e dorës pasi rrëshqiti dhe iu desh të qepte plagën pa pasur akses në kujdes të specializuar mjekësor. Për pjesën më të madhe të udhëtimit, Bushby ka shtyrë një karrocë të posaçme të quajtur “The Beast”, ku transporton ushqimin, pajisjet dhe furnizimet e nevojshme. Ai është mbështetur financiarisht nga familja, miqtë dhe donacionet e njerëzve që janë frymëzuar nga historia e tij.

Përvoja, sipas tij, i ka ndryshuar mënyrën se si e sheh botën. “Jeta është e shkurtër dhe duhet ta jetosh sa më mirë që të mundesh. Njerëzit do të të përqafojnë dhe do të të ndihmojnë të ecësh përpara”, është shprehur ai. Pandemia e COVID-19 e detyroi të ndalonte për një periudhë në Meksikë, ndërsa konfliktet gjeopolitike e detyruan të ndryshonte itinerarin, duke shmangur Rusinë dhe Iranin. Në vend të kësaj, ai kaloi Detin Kaspik drejt Azerbajxhanit dhe më pas vazhdoi rrugën përmes Turqisë dhe Evropës. Në mesin e vitit 2026 ai kishte mbërritur në Belgjikë.

Megjithatë, vetëm pak muaj para përfundimit të misionit, ai po përballet me një pengesë të re. Operatori i Tunelit të Kanalit të La Manshit i ka refuzuar kërkesën për ta kaluar tunelin në këmbë për arsye sigurie, ndërsa rregullat aktuale nuk i lejojnë as të notojë nga Franca drejt Britanisë. Bushby po negocion me autoritetet franceze për të gjetur një zgjidhje që nuk bie ndesh me rregullat që i ka vendosur vetes. Historia e tij është edhe një histori këmbënguljeje personale. Si fëmijë, Bushby vuante nga disleksia dhe ishte vazhdimisht objekt i bullizmit në shkollë. Nëna e tij, Angela, ka treguar se ai kthehej shpesh në shtëpi i lënduar nga fyerjet e shokëve të klasës, të cilët e quanin “budalla”.

Megjithatë, ai nuk u dorëzua kurrë. Pas disa përpjekjeve arriti të kalonte testet e vështira për t’u bërë pjesë e parashutistëve të ushtrisë britanike, ndërsa më vonë nisi aventurën që do ta bënte të njohur në mbarë botën. Edhe gjatë mungesës së tij prej gati tre dekadash, nëna e tij nuk reshti së bleri një dhuratë për të çdo Krishtlindje, me shpresën se një ditë djali i saj do të kthehej në shtëpi. Nëse gjithçka shkon sipas planit, Karl Bushby pritet të mbërrijë në Hull në muajin shtator, duke mbyllur një udhëtim 27-vjeçar që nisi thjesht nga një bast mes miqsh dhe u kthye në një nga ekspeditat më të jashtëzakonshme të historisë moderne.