Ngatërresa fatale i kushton jetën motoristit, ndërhyri për të ndihmuar një grua

Ngjarja që i mori jetën një 36-vjeçari në Somma Lombardo, në provincën e Varezes, gjatë natës mes 1 dhe 2 gushtit, ka marrë një kthesë edhe më tragjike. Sipas hetimeve, vdekja e tij lidhet me një akt të qëllimshëm, i nxitur nga xhelozia e tepruar.

Në rrugën shtetërore drejt zonës së Maddalenës, një 43-vjeçar, që drejtonte një automjet, dyshohet se ka përplasur qëllimisht skuterin ku udhëtonin 36-vjeçari dhe një grua 39-vjeçare, ish-e dashura e tij.

E pa ish-të dashurën me një burrë tjetër dhe u verbua nga xhelozia

Gruaja kishte pranuar të takohej për herë të fundit me ish-partnerin, pasi lidhja e tyre kishte përfunduar më pak se një muaj më parë. Ai i kishte lënë takim në Maddalena për t'i kthyer disa sende personale.

Mbrëmjen e ngjarjes, 39-vjeçarja po shkonte drejt vendit të takimit me skuter, duke ndjekur udhëzimet në telefonin celular, por humbi orientimin. Ajo ndaloi në anë të rrugës, e pasigurt se ku duhej të shkonte.

Në atë moment, një 36-vjeçar që po kalonte rastësisht, pa e njohur fare gruan, u ndal për ta ndihmuar. Ai i ofroi ta çonte me skuter deri në vendin e takimit.

Duke mos e parë të mbërrinte, 43-vjeçari hipi në makinë për ta kërkuar. Sapo pa ish-të dashurën në shoqërinë e 36-vjeçarit, dyshohet se i përplasi qëllimisht me automjet.

Pas përplasjes, në vendngjarje mbërritën karabinierët dhe ekipet e emergjencës 118. Për 36-vjeçarin nuk mund të bëhej më asgjë, pasi ai humbi jetën në vend.

Hetimet e kryera nga autoritetet përjashtuan mundësinë e një aksidenti rrugor, duke çuar në arrestimin e 43-vjeçarit me akuzën e vrasjes. /Piranjat News/