Studentët në Universitetin e Korçës kanë vijuar bojkotin e mësimit, në mbështetje të protestës studentore e ...
BOTA
OBSH paralajmëron: Përgatituni për më shumë raste të infektimeve me Hantavirus
PiranjatPërditësimi i fundit 13 May 2026, 08:33
Kreu i Organizatës Botërore të Shëndetësisë, Tedros Adhanom Ghebreyesus, u ka bërë thirrje vendeve të përgatiten për më shumë raste me hantavirus, pas përkeqësimit të situatës së një gruaje franceze të infektuar në anijen turistike MV Hondius.
Autoritetet shëndetësore në Paris njoftuan se 65-vjeçarja, e prekur nga varianti e Andeve të virusit, ndodhet në terapi intensive dhe është vendosur në intubim për shkak të formës më të rëndë të sëmundjes kardiopulmonare.
Në një konferencë për shtyp në Madrid, Tedros falënderoi Spanjën për “dhembshurinë dhe solidaritetin” e treguar ndaj pasagjerëve të anijes dhe u bëri thirrje autoriteteve të ndjekin rekomandimet e OBSH-së, që përfshijnë karantinë 42-ditore dhe monitorim të vazhdueshëm të kontakteve me rrezik të lartë.
“Për momentin nuk ka shenja të një epidemie më të madhe, por situata mund të ndryshojë. Duke pasur parasysh periudhën e gjatë të inkubacionit, është e mundur të shohim më shumë raste në javët e ardhshme”, deklaroi ai.
Anija MV Hondius, e cila po lundronte nga Argjentina drejt Kepit të Gjelbër, u bë epiqendra e shpërthimit pasi tre pasagjerë – një çift holandez dhe një shtetas gjerman – humbën jetën nga virusi. Edhe pse hantavirusi zakonisht transmetohet nga brejtësit e egër, OBSH theksoi se në raste të rralla mund të transmetohet edhe nga njeriu te njeriu përmes kontakteve të afërta.
Deri më tani, OBSH ka konfirmuar 11 raste të variantit të Andeve të virusit, përfshirë një shtetase amerikane dhe gruan franceze që u evakuuan nga anija.
Ndërkohë, Ministria spanjolle e Shëndetësisë konfirmoi se një nga 14 spanjollët e vendosur në karantinë në një spital ushtarak në Madrid rezultoi pozitiv për virusin dhe po shfaq simptoma të lehta respiratore, por gjendja e tij mbetet stabile.
Tedros paralajmëroi se mund të ketë më shumë infektime për shkak të kontakteve të shumta mes pasagjerëve në javët përpara se të konfirmohej rasti i parë më 2 maj.
“Pati shumë ndërveprim mes pasagjerëve gjatë udhëtimit dhe periudha e inkubacionit është gjashtë deri në tetë javë. Për këtë arsye presim më shumë raste”, tha ai.
Pas refuzimit të autoriteteve të Kepit të Gjelbër për ta lejuar anijen të ankorohej, më shumë se 120 pasagjerë dhe anëtarë ekuipazhi u evakuuan në Tenerife në një operacion të koordinuar nga autoritetet spanjolle.
Ndërkohë, ministrja franceze e Shëndetësisë, Stéphanie Rist, deklaroi se deri tani nuk ka prova që virusi të ketë pësuar mutacion, megjithëse analizat laboratorike ende vijojnë.
