Shqipëria u përfshi në zonën e temperaturave mbi mesataren gjatë periudhës qershor–korrik, ndërsa Europa Perëndi...
BOTA
OKB propozon kontributin e Organizatës për transportin e plehrave përmes Hormuzit: Të zvogëlohen rreziqet
PiranjatPërditësimi i fundit 25 Gusht 2026, 09:19
Sekretari i Përgjithshëm i OKB-së, Antonio Guterres, ka propozuar që Kombet e Bashkuara të ndihmojnë në lehtësimin e transportit të plehrave kimike përmes Ngushticës së Hormuzit, në një përpjekje për të ulur rrezikun e incidenteve dhe për të krijuar hapësirë për diplomaci.
“Qëllimi është i thjeshtë: të zvogëlohen rreziqet e menjëhershme, të mbështetet një tranzicion më i butë dhe më i parashikueshëm dhe të ndihmohet në rivendosjen e besimit të nevojshëm për diplomacinë dhe deeskalimin”, deklaroi Guterres gjatë një konference për shtyp.
Sipas tij, OKB-ja ka nisur të punojë për këtë çështje që në mars dhe propozon krijimin e një mekanizmi për regjistrimin dhe verifikimin e anijeve që transportojnë, fillimisht, plehra dhe produkte të ngjashme.
Nisma do të shoqërohet me një mekanizëm për parandalimin e incidenteve, i cili pritet të pilotohet nga Omani.
Guterres sqaroi se OKB-ja nuk do të autorizojë tranzitin e anijeve përmes Ngushticës së Hormuzit dhe nuk do të ndryshojë të drejtat apo detyrimet e shteteve sipas ligjit ndërkombëtar.
Në vend të kësaj, Kombet e Bashkuara do të vepronin si një “ndërmjetës neutral”, duke regjistruar dhe verifikuar anijet dhe duke ndihmuar në uljen e rrezikut gjatë lëvizjes së tyre.
“Ne jemi absolutisht të gatshëm ta vëmë në funksion”, tha Guterres, duke pranuar se kjo nuk do të thotë domosdoshmërisht se të gjitha palët e përfshira në konflikt e kanë pranuar mekanizmin.
Sipas kreut të OKB-së, organizata synon të luajë një rol neutral dhe lehtësues, me objektiv kryesor uljen e tensioneve dhe krijimin e kushteve më të favorshme për diplomaci.
