Pas 26 vitesh, Princi belg pranon djalin e tij të fshehtë/ Testi i ADN-së konfirmon atësinë

Princi Laurent i Belgjikës ka njohur zyrtarisht 26-vjeçarin Clement Vandenkerckhove si djalin e tij, pas një procesi që përfshiu edhe një test ADN-je.

Ceremonia e njohjes së atësisë është zhvilluar rreth gjashtë muaj më parë në bashki, ndërsa lajmi është bërë publik vetëm së fundmi.

Clement është djali i këngëtares belge Wendy Van Wanten, emri i vërtetë i së cilës është Iris Vandenkerckhove. Ajo kishte pasur një lidhje me Princin Laurent përpara martesës së tij me Princeshën Claire, në vitin 2003.

26-vjeçari e mësoi identitetin e babait të tij kur ishte 16 vjeç. Disa vite më vonë, ai vendosi të kontaktonte Princin Laurent dhe mes tyre nisi të ndërtohej një marrëdhënie.

Me propozimin e princit, të dy iu nënshtruan një testi ADN-je, i cili konfirmoi atësinë me një përputhje prej 99.5%.

Megjithëse tashmë është njohur ligjërisht si djali i Princit Laurent, Clement nuk do të ketë rol në familjen mbretërore belge. Ai nuk do të përfshihet në linjën e trashëgimisë së fronit, nuk do të marrë pjesë në aktivitetet zyrtare të familjes mbretërore dhe nuk do të përfitojë pagesë mbretërore.

Ndërkohë, 26-vjeçari ka deklaruar se ende nuk ka vendosur nëse do të përdorë mbiemrin e babait, Saxe-Coburg, pasi është i lidhur me mbiemrin që ka mbajtur gjatë gjithë jetës.

Historia e tij u bë e njohur për publikun përmes një dokumentari televiziv, ku Clement foli për takimin e parë me të atin dhe për rrugëtimin që çoi në njohjen zyrtare të atësisë.

Rasti rikthen në vëmendje edhe historinë e ish-mbretit Albert II, babait të Princit Laurent, i cili në vitin 2020 njohu zyrtarisht Delphine Boël si vajzën e tij nga një lidhje jashtëmartesore. Ajo fitoi më pas të drejtën për titullin e princeshës dhe përdor emrin Delphine de Saxe-Coburg.