Në fund të vitit 2025, numri i mjeteve rrugore të regjistruara (me status aktiv ose të çregjistruara përkohësisht) arriti n...
BOTA
Pas disa javësh protesta/ Zelensky shkarkon shefin e Forcave të Armatosura të Ukrainës
PiranjatPërditësimi i fundit 21 Korrik 2026, 22:56
Presidenti i Ukrainës, Volodymyr Zelensky, ka shkarkuar nga detyra komandantin e përgjithshëm të forcave të armatosura, Oleksandr Syrskyi, duke emëruar në vend të tij Mykhailo Fedorov. Vendimi vjen pas javësh debatesh dhe protestash në Ukrainë, të nxitura nga shqetësimet se largimi i Fedorovit nga posti i ministrit të Mbrojtjes mund të frenonte modernizimin e ushtrisë, veçanërisht zhvillimin e kapaciteteve të bazuara te dronët.
Fedorov, 35 vjeç, është konsideruar një nga figurat kryesore të transformimit teknologjik të ushtrisë ukrainase dhe kishte shprehur publikisht mospajtime me strategjinë ushtarake të Syrskyit, i cili ishte kritikuar për qasjen e tij më tradicionale, të mbështetur te këmbësoria dhe artileria.
Në reagimin e tij, Zelensky falënderoi Syrskyin për kontributin në fazat më të rëndësishme të luftës kundër Rusisë.
“Fakti është se Oleksandr Syrskyi siguroi rezultatet e Ukrainës në mbrojtjen e Kievit, në operacionin ofensiv të Kharkivit dhe në operacionin e Kurskut”, deklaroi presidenti ukrainas.
Ai shtoi se mbrojtja e Ukrainës vazhdon dhe se ushtria ka nevojë për një qasje që garanton respekt për çdo ushtar.
“Është përshkuar një rrugë e rëndësishme, mbrojtja e Ukrainës vazhdon dhe një qëndrim dinjitoz ndaj çdo ushtari është i nevojshëm. Jam mirënjohës ndaj Oleksandr Syrskyit dhe secilit prej ushtarëve tanë për pozicionet e forta të Ukrainës në vijën e parë të frontit”, u shpreh Zelensky.
Emërimi i Fedorovit në krye të forcave të armatosura shihet si një sinjal për vijimin e modernizimit të ushtrisë ukrainase dhe rritjen e rolit të teknologjisë në operacionet ushtarake.
