Pas marrëveshjes së dakordësuar, SHBA pritet të hapë dy baza të reja ushtarake në Groenlandë

SHBA-të planifikojnë të rivendosin një bazë ushtarake të epokës së Luftës së Ftohtë në jug të Groenlandës dhe të ngrenë një tjetër në bregun lindor, që tani përdoret nga patrulla daneze, raporton agjencia e lajmeve Reuters.

Kjo vjen pas marrëveshjes së nënshkruar me Danimarkën dhe Groenlandën të martën, e cila u njoftua nga Presidenti i SHBA-së, Donald Trump.

Vendet janë Narsarsuaq, popullsia e të cilit është zvogëluar në disa dhjetëra njerëz që kur SHBA-të mbyllën bazën e tyre ushtarake Bluie West One në vitet 1950, dhe Mestersvig, një post ushtarak i përdorur nga Sirius Dog Sled Patrull, një njësi e forcave speciale daneze.

Danimarka, Groenlanda dhe Shtetet e Bashkuara pritet të nënshkruajnë marrëveshjen e tyre të re në Asamblenë e Përgjithshme të Kombeve të Bashkuara në New York City.

Marrëveshja vjen pas muajsh presioni nga Trump, i cili prej kohësh ka thënë se dëshiron që SHBA-të të kontrollojnë Groenlandën dhe herë pas here ka refuzuar të përjashtojë forcën ushtarake ose ekonomike për të përvetësuar territorin gjysmë-autonom danez.

Kërcënimet e Trump, të cilat arritën kulmin në janar, shkaktuan një krizë diplomatike brenda NATO-s dhe i shtynë Danimarkën dhe Groenlandën në negociata me Uashingtonin që synonin zbutjen e presionit.