Pas më shumë se 20 vitesh, Parlamenti Evropian ndryshon rregullat e fluturimeve me avionë. Ja çfarë përfitojnë pasagjerët

Parlamenti Evropian ka miratuar rregulla të reja për të drejtat e pasagjerëve ajrorë, të cilat parashikojnë kompensime më të shpejta, bagazh dore falas dhe vende të garantuara pranë fëmijëve. Masa përditëson rregulloren në fuqi që prej vitit 2004 dhe synon të forcojë mbrojtjen e udhëtarëve.

Një nga ndryshimet më të rëndësishme është e drejta për të marrë në bord një bagazh dore pa pagesë shtesë. Ndërkohë, linjave ajrore do t'u lejohet të ofrojnë tarifa më të ulëta për pasagjerët që udhëtojnë pa çantë dore ose çantë shpine. Eurodeputetët kërkuan gjithashtu ndalimin e tarifave shtesë për korrigjimin e gabimeve drejtshkrimore në emra dhe për përdorimin e kartës së hipjes të printuar.

Procedura për kompensimet është thjeshtuar. Pasagjerët do të kenë nëntë muaj kohë për të paraqitur kërkesën, ndërsa linjat ajrore do të jenë të detyruara të përgjigjen ose të kryejnë pagesën brenda 30 ditëve.

Udhëtarët do të kenë të drejtë të kërkojnë kompensim në rast të vonesave mbi tre orë, anulimit të fluturimit më pak se 14 ditë para nisjes ose mohimit të hipjes në bord. Kompensimi do të variojë nga 250 euro për fluturimet deri në 1.500 kilometra dhe deri në 600 euro për fluturimet me distanca më të gjata.

Megjithatë, linjat ajrore nuk do të jenë të detyruara të paguajnë kompensim nëse vonesat ose anulimet shkaktohen nga rrethana të jashtëzakonshme jashtë kontrollit të tyre, si fatkeqësitë natyrore, lufta, kushtet ekstreme të motit, sjellja e pasagjerëve problematikë ose grevat e kompanive që menaxhojnë aeroportet.

Rregullat e reja parashikojnë gjithashtu që vendet ngjitur të ofrohen pa pagesë për personat që udhëtojnë me fëmijë nën 14 vjeç, gratë shtatzëna dhe personat me aftësi të kufizuara. Për këta të fundit, linjat ajrore do të jenë të detyruara të ofrojnë ndihmë edhe në rast se humbasin fluturimin për shkak të vonesave gjatë shoqërimit në aeroport.

Marrëveshja pritet të hyjë në fuqi 20 ditë pas publikimit në Fletoren Zyrtare të Bashkimit Evropian, pasi të miratohet edhe nga Këshilli i BE-së. Më pas, linjat ajrore do të kenë një periudhë tranzitore njëvjeçare për t'u përshtatur me rregullat e reja. /PiranjatNews/