Pentagoni nis testimin e testosteronit për ushtarët mbi 30 vjeç/ Hegseth: Synojmë një forcë më të madhe dhe aftësi më të mira

Sekretari i Mbrojtjes i SHBA-së, Pete Hegseth, ka njoftuar një program të ri shëndetësor për trupat amerikane, ku të gjithë ushtarakët aktivë dhe rezervistë mbi moshën 30 vjeç do t’i nënshtrohen kontrolleve për nivelet e testosteronit.

Sipas Pentagonit, testi do të jetë pjesë e vlerësimeve periodike shëndetësore dhe synon të identifikojë mungesën e hormonit që lidhet me energjinë, masën muskulore, forcën fizike dhe mirëqenien e përgjithshme.

“Departamenti i Testosteronit të Lartë”, shkroi Hegseth në një video të publikuar në platformën X, duke deklaruar se programi do të sigurojë që ushtarët “të kenë nivelet e duhura të testosteronit për të vepruar në formën e tyre më të mirë”.

Ushtarëve që do të rezultojnë me nivele të ulëta të testosteronit do t’u ofrohet terapi zëvendësuese hormonale, por vetëm në mënyrë vullnetare dhe nën kujdes mjekësor.

Zëdhënësi i Pentagonit, Sean Parnell, sqaroi se kontrolli do të jetë i detyrueshëm për të gjithë personelin e komponentit aktiv dhe rezervist mbi 30 vjeç. Ushtarët nën këtë moshë do të mund të kërkojnë testimin në mënyrë vullnetare.

“Ky program do t’i mundësojë Departamentit të krijojë një bazë gjithëpërfshirëse dhe të ofrojë terapi të synuar me testosteron, duke mbështetur një forcë luftarake të shëndetshme dhe të aftë”, tha Parnell.

Pentagoni theksoi se programi nuk ka lidhje me përdorimin e hormoneve për rritje artificiale të muskujve. Marrja e testosteronit pa arsye mjekësore dhe pa recetë mbetet e ndaluar në ushtri.

Megjithatë, njoftimi ka shkaktuar debate politike në SHBA. Senatorja demokrate Tammy Duckworth, veterane e luftës në Irak, kërkoi që kontrolli hormonal të jetë i disponueshëm si për burrat ashtu edhe për gratë në ushtri.

Ndërsa kongresmenia Chrissy Houlahan e kritikoi iniciativën, duke e cilësuar si pjesë të “obsesionit të fundit të Hegseth me luftën kulturore”.

Ekspertët shpjegojnë se nivelet e testosteronit tek meshkujt fillojnë të bien natyrshëm zakonisht pas moshës 30-40 vjeç. Mungesa e tij mund të shoqërohet me lodhje, ulje të dëshirës seksuale, ndryshime humori dhe humbje të masës muskulore.

Sipas disa vlerësimeve, testosteroni i ulët prek rreth 10-40% të burrave të moshuar në nivel global.

Dr. Mohit Khera, profesor i urologjisë në Kolegjin e Mjekësisë Baylor, tha se kontrolli i niveleve të testosteronit mund të jetë i rëndësishëm për shëndetin e përgjithshëm, veçanërisht për ushtarët që kërkojnë performancë të lartë fizike.

Megjithatë, ai paralajmëroi se terapia hormonale nuk duhet të përdoret pa simptoma dhe pa vlerësim mjekësor, pasi mund të ketë pasoja si infertiliteti tek meshkujt e rinj dhe rritje të mundshme të rrezikut kardiovaskular.

Vendimi i Pentagonit vjen në një kohë kur administrata amerikane po shqyrton lehtësimin e qasjes ndaj terapive me testosteron dhe përdorimit të tyre në mjekësi.