Autoritetet ukrainase kundër korrupsionit, NABU dhe SAPO, kanë nisur një aksion ndaj zyrtarëve të Prokurorisë së Përgj...
BOTA
Përfundon pengmarrja e 10 pengjeve që zgjati mbi 15 orë, FBI vret autorin
PiranjatPërditësimi i fundit 3 Qershor 2026, 20:43
Një situatë dramatike që zgjati mbi 15 orë në qendër të qytetit të Bakersfield, Kaliforni, ka përfunduar të mërkurën me eliminimin e pengmarrësit dhe shpëtimin e të gjithë pengjeve.
Konflikti nisi pasditen e së martës, rreth orës 13:00, kur autoritetet morën një telefonatë për një kërcënim me bombë në ndërtesën katërkatëshe ku ndodhej një degë e “Chase Bank”. 41-vjeçari Anthony Scott Searles-Harris, i cili rezultonte të ishte një shkelës seksual i regjistruar dhe me histori dhune, u mbyll brenda godinës duke mbajtur peng 10 persona.
Departamenti i Policisë së Bakersfield, në bashkëpunim me ekipin e negociatave të krizës, arriti të mbante komunikim telefonik me autorin gjatë gjithë natës. Si rezultat i negociatave, dy nga pengjet u liruan gjatë mbrëmjes së të martës.
Situata u përshkallëzua në orët e para të mëngjesit të së mërkurës. Rreth orës 04:20, agjentët e FBI-së ndërhynë duke qëlluar për vdekje 41-vjeçarin Searles-Harris. Pas ndërhyrjes, policia konfirmoi se 10 pengjet e tjerë që ndodheshin ende brenda ndërtesës u gjetën të padëmtuar.
Gjatë orëve të pengmarrjes, zona përreth ndërtesës, duke përfshirë Bashkinë dhe selinë e policisë, u evakuua plotësisht, ndërsa qytetarët u paralajmëruan të qëndronin larg perimetrit të sigurisë. Dëshmitarët okularë, si transmetuesi Jacob Davidson, e përshkruan praninë e forcave të rendit si “më të madhen e parë ndonjëherë në këtë qytet”.
Autoritetet federale dhe lokale po vijojnë hetimet për të zbardhur motivet e sakta të këtij kërcënimi dhe incidentit të rëndë, i cili fatmirësisht përfundoi pa viktima në mesin e civilëve.
