Përmbytjet mes Tibetit dhe Nepalit/ Bilanci rëndohet: 626 viktima dhe 2,400 të zhdukur

Përmbytjet mes Tibetit dhe Nepalit kanë lënë pas një bilanc të rëndë, me 626 viktima dhe rreth 2,400 persona të zhdukur. Operacionet e kërkim-shpëtimit vijojnë në një terren të vështirë, ndërsa autoritetet përballen edhe me rrezikun e përmbytjeve të tjera.

Shpresat për të gjetur të mbijetuar nën rrënoja janë tashmë shumë të vogla, por ekipet vijojnë kërkimet për personat e zhdukur dhe trupat e viktimave. Tre trupa janë nxjerrë nga lumi pasi kanë përfunduar në territorin e Indisë, qindra kilometra larg zonës së katastrofës.

Mes personave që ende nuk dihet se ku ndodhen janë edhe rreth 90 punëtorë të bllokuar në një hidrocentral që është ende në ndërtim. Punëtorë të tjerë që po punonin në një linjë transmetimi të energjisë elektrike janë lokalizuar.

Në zonat malore ka gjithashtu shqetësim për dhjetëra alpinistë dhe turistë që rezultojnë të zhdukur. Disa prej tyre mund të jenë ende në shtigjet e Himalajeve dhe të mos kenë pasur dijeni për përmasat e katastrofës.

Disa persona kanë arritur të shpëtojnë duke u ngjitur në shpatet e maleve. Mes tyre janë disa shtetas italianë, ndërsa 96 indianë janë shpëtuar në anën kineze të kufirit. Ata mendohet se kanë kaluar drejt Nepalit dhe janë në pritje të ekipeve të shpëtimit.

Pse Nepali po refuzon ekipet e huaja?
Përmasat e katastrofës kanë ngritur edhe një problem tjetër: organizimin e operacioneve të shpëtimit. Kina, pavarësisht kapaciteteve të saj, vetëm pas disa ditësh ka arritur të dërgojë një ekip me qen kërkimi në një prej zonave të prekura.

Ndërkohë, Nepali ka vendosur të mos pranojë ekipe të huaja shpëtimi, pavarësisht ofertave për ndihmë. Autoritetet në Katmandu i referohen përvojës së tërmetit të vitit 2015, kur ardhja e ekipeve nga dhjetëra vende krijoi probleme logjistike në një vend me kapacitete të kufizuara.

Qëndrimi i qeverisë nepaleze është që ndihma ndërkombëtare të vijë në formën e fondeve, ndërsa operacionet në terren të menaxhohen nga strukturat vendase.

Por zona e goditur ka edhe rëndësi strategjike. Përmbytjet kanë prekur luginën që lidh Nepalin me pikën kufitare të Gyirongut, një nga korridoret kryesore tregtare me Kinën. Përgjatë luginës së lumit Trishuli kalon edhe një nga rrugët drejt Katmandusë.

Në këtë zonë Kina ka propozuar edhe ndërtimin e një hekurudhe që do të lidhte Gyirongun me kryeqytetin nepalez. Projekti parashikon ura të larta dhe tunele nëpër Himalaje, ndërsa kostoja është vlerësuar në rreth 30 milionë euro për kilometër.

Uji tërhiqet, por rreziku mbetet
Një zhvillim pozitiv ka ardhur nga liqeni i krijuar pas shembjes së akullnajës. Të enjten, operacionet e shpëtimit u ndërprenë për shkak të frikës se niveli i ujit mund të çante barrierën natyrore dhe të shkaktonte një tjetër përmbytje.

Gjatë natës, disa çarje në pjesën e sipërme të barrierës kanë lejuar që uji të shkarkohet gradualisht nëpër lumenjtë Lhende Khola dhe Trishuli.

Megjithatë, rreziku nuk është zhdukur. Në rrjedhën e poshtme ndodhen edhe barriera të tjera natyrore, të krijuara nga shkëmbinjtë e shkëputur nga mali. Ato po monitorohen, përfshirë edhe përmes të dhënave satelitore.