Përplasen dy autobusë në Siri, raportohen 19 të vdekur dhe 27 të plagosur

Një aksident i rëndë rrugor ka tronditur Sirinë qendrore, ku përplasja mes dy autobusëve ka shkaktuar të paktën 19 viktima dhe 27 të plagosur. Ngjarja ndodhi në autostradën që lidh Damaskun me Deir ez-Zorin, në zonën mes Palmirës dhe Al-Sukhnah.

Sipas autoriteteve siriane, në aksident u përfshinë një autobus civil dhe një autobus që transportonte pjesëtarë të forcave të sigurisë së brendshme. Numri i viktimave është paraprak dhe mund të ndryshojë, ndërsa ekipet e emergjencës kanë ndërhyrë në vendngjarje për të shpëtuar të plagosurit dhe për t’i dërguar në spital.

Mediat e huaja bëjnë me dije se shkaqet e përplasjes nuk janë bërë ende të ditura dhe autoritetet kanë nisur hetimet për të zbardhur rrethanat e ngjarjes.