Presidenti ukrainas Volodymyr Zelensky ka njoftuar sanksione dhe një hetim pas një shkëmbimi zjarri midis anëtarëve të shër...
BOTA
Prita në garazh, lidhja me kabllo dhe telefonata e fundit/ Vrau ish-të dashurën, detaje të reja nga krimi tronditës
PiranjatPërditësimi i fundit 4 Shtator 2026, 21:14
Lorena Isceri, 45-vjeçarja që të enjten u hodh nga një mbikalim i autostradës A1 në Barberino del Mugello, dyshohet se kishte arritur të çlirohej nga lidhëset plastike që ish-partneri i saj, Federico Vella, i kishte shtrënguar në kyçe përpara se ta fuste në bagazhin e makinës së tij.
Ajo më pas do të kishte qëndruar rreth 20 minuta në telefon me qendrën operative të policisë. Telefonata u ndërpre papritur nga 36-vjeçari. Fjalët e fundit të saj dyshohet se kanë qenë: “Çfarë po bën?”
Megjithatë, ende nuk është e qartë nëse gruaja ishte goditur për vdekje përpara se të hidhej nga lartësia prej dhjetëra metrash, apo nëse kishte humbur jetën si pasojë e përplasjes jashtëzakonisht të fortë pas rënies.
Federico Vella, i cili kishte njoftuar më herët në rrjetet sociale për qëllimin e tij për të kryer një akt ekstrem, më pas u vetëvra duke u hedhur nga i njëjti mbikalim, pas mbërritjes së efektivëve të policisë.
Sulmi i paramenduar dhe goditjet për ta trullosur
Federico Vella dyshohet se kishte planifikuar gjithçka në detaje, që nga momenti kur e përndoqi ish-partneren e deri te mjetet që përdori për ta lidhur. Për këtë arsye, Prokuroria e Firences po heton edhe hipotezën e paramendimit të sulmit që çoi në vrasje.
36-vjeçari ishte fshehur në garazhin e ish-partneres së tij, në periferi të Firences. Gruaja ishte ndarë prej tij në gushtin e vitit të kaluar.
Ai kishte mbajtur dyert të hapura duke vendosur shirit ngjitës mbi sensorët fotoelektrikë. Aty kishte pritur Lorena Iscerin dhe, kur gruaja mbërriti për të parkuar makinën, ai e ka goditur me grushte, duke e trullosur.
Më pas, fillimisht i kishte lidhur duart me lidhëse plastike, të cilat i kishte marrë posaçërisht për këtë qëllim, dhe më pas e kishte futur në bagazhin e makinës me të cilën ajo kishte mbërritur pak më parë. Më pas, ai ishte ulur në timon dhe ishte larguar me makinë.
Telefonata nga bagazhi dhe hedhja
Në bagazh, burri kishte vendosur edhe çantën e 45-vjeçares. Për këtë arsye, pasi kishte liruar disi shtrëngimin e lidhëseve plastike në kyçet e saj, gruaja mund të ketë arritur të kontaktojë nënën dhe një mik.
Megjithatë, është e sigurt se ajo kishte folur për një kohë të gjatë me numrin e emergjencës 112, një telefonatë që, sipas të dhënave të deritanishme, ka zgjatur rreth 20 minuta.
Më pas, pasi kishte kuptuar se çfarë po ndodhte, Vella dyshohet se ndaloi makinën mbi viadukt dhe hapi bagazhin.
“Çfarë po bën?” – ishin fjalët e saj të regjistruara në telefonatë, përpara se 36-vjeçari të ndërpriste çdo kontakt me numrin e emergjencës.
Më pas, ai dyshohet se e tërhoqi në anën tjetër të karrexhatës dhe e hodhi përtej barrierës mbrojtëse. Ende nuk është e qartë nëse në atë moment gruaja ishte gjallë apo kishte vdekur.
Kur mbërritën efektivët e policisë, të cilët kishin arritur të lokalizonin makinën duke gjurmuar telefonin e Lorena Iscerit, 36-vjeçari ishte ndalur.
“Çfarë ke bërë?”, e pyetën efektivët. “Ajo më tradhtoi. Më trajtoi keq. Më sulmoi”, ishte përgjigjja e tij.
Pasuan një sërë fjalish të pakuptimta dhe, në fund, hedhja fatale nga mbikalimi. Pak më parë, ai kishte lënë edhe një mesazh në rrjetet sociale: “Mirupafshim të gjithëve.” /PiranjatNews/
