Boksieri shqiptar, Kristian Prenga, u mposht me nokaut në raundin e dytë nga Antoni Xhoshua, në sfidën që u mbajt në Xhedah t&eu...
BOTA
Raketa më e rrezikshme e Iranit po bëhet edhe më vdekjeprurëse
PiranjatPërditësimi i fundit 26 Korrik 2026, 11:34
Raketa balistike Kheibar Shekan, një nga armët kryesore të arsenalit iranian, po shfaqet gjithnjë e më e vështirë për t’u neutralizuar, ndërsa Teherani po përmirëson mënyrën e përdorimit të saj në sulmet ndaj objektivave amerikane në Lindjen e Mesme.
Sipas zyrtarëve amerikanë të cituar nga Wall Street Journal, Irani po kombinon trajektore të ndryshme fluturimi, manovra dhe shpejtësi të ndryshme për të ngatërruar sistemet e mbrojtjes ajrore dhe për të rritur mundësinë që raketat të depërtojnë.
Edhe pse shumica e raketave janë interceptuar nga Shtetet e Bashkuara dhe aleatët e tyre, disa kanë arritur të godasin objektivat, thanë zyrtarët.
Ndryshe nga raketat më të vjetra iraniane, të cilat kërkojnë kohë për t’u furnizuar me karburant para lëshimit, Kheibar Shekan përdor karburant të ngurtë, çka i lejon të transportohet dhe të lëshohet shpejt nga mjete lëvizëse, duke e bërë më të vështirë zbulimin dhe shkatërrimin e saj nga aviacioni amerikan apo izraelit.
Ekspertët ushtarakë thonë se disa variante të raketës janë të pajisura me një motor të vogël në pjesën e përparme, i cili i lejon të ndryshojnë drejtimin në fazën përfundimtare të fluturimit, kur afrohen drejt objektivit me shpejtësi rreth Mach 5.
Përveç raketave balistike, Irani po përdor njëkohësisht edhe dronë sulmues me shpejtësi të lartë dhe raketa të tjera më pak të sofistikuara, me synimin për të mbingarkuar sistemet e mbrojtjes ajrore.
Sipas zyrtarëve amerikanë, që nga rifillimi i luftimeve, Irani ka goditur vazhdimisht zonat ku janë vendosur trupat amerikane në bazat ushtarake në Lindjen e Mesme, si dhe radarët që mbështesin sistemet e mbrojtjes ajrore në rajon.
“Mendoj se kjo tregon se Irani po mëson dhe po kërkon mënyra për të na goditur”, tha ish-komandanti i Komandës Qendrore të Shteteve të Bashkuara (CENTCOM), gjenerali në pension Joseph Votel.
Sipas vlerësimeve amerikane dhe izraelite, para nisjes së luftës Irani zotëronte rreth 2 mijë e 500 raketa balistike me rreze të mesme, përfshirë Kheibar Shekan.
Megjithëse disa objekte prodhimi janë shkatërruar, ekspertët besojnë se Teherani mund të vazhdojë montimin e raketave nga komponentët e ruajtur në bazat nëntokësore.
Ekspertja e strategjisë iraniane, Nicole Grajewski, vlerëson se raketa është bërë arma kryesore e Iranit për shkak të kostos së ulët të prodhimit, fleksibilitetit në përdorim dhe efektivitetit të saj në fushën e betejës.
Analistët theksojnë se çdo përdorim në luftime i jep Iranit të dhëna të reja për të përmirësuar taktikat dhe për të rritur aftësinë e raketave për të shmangur sistemet e mbrojtjes ajrore.
