Microsoft po ofron një plan të ri për largim vullnetar nga puna për rreth 60,000 punonjës në Shtetet e Bashkuara, Kanada, Indi dh...
BOTA
Rasti i Omar Benguit/ Bëri 23 vite burg, por provat e reja hedhin dyshime për një kurth nga ana e policisë
PiranjatPërditësimi i fundit 16 February 2026, 11:00
Një ngjarje e pazakontë po trondit sërish një nga çështjet më të debatueshme të viteve të fundit në Britani, pasi një burrë që ka kaluar 23 vite në burg për vrasje mund të jetë dënuar mbi prova të fabrikuara dhe dëshmi të detyruara.
Rasti i Omar Benguit, i dënuar për vrasjen e studentes koreano-jugore Jong-Ok Shin në vitin 2002, është rikthyer në qendër të vëmendjes pas një hetimi të ri.
Krimi që tronditi Bournemouth-in Jong-Ok Shin, e njohur si Oki, u godit për vdekje me thikë ndërsa po kthehej në shtëpi nga një klub nate në Bournemouth.
Ngjarja shkaktoi presion të madh publik dhe ndërkombëtar mbi autoritetet për kapjen e autorit.
Pas dy gjyqeve pa vendim, Benguit u shpall fajtor në gjyqin e tretë në vitin 2005. Ai kishte precedentë për drogë dhe armë të ftohta, çka ndikoi në perceptimin ndaj tij gjatë procesit.
Dëshmitë që po shemben Hetimi i fundit ka zbuluar se:
-15 dëshmitarë kyç të akuzës janë diskredituar ose kanë pranuar se janë detyruar të ndryshojnë deklaratat. -Dëshmitarja kryesore, e identifikuar si “BB”, kishte histori gënjeshtrash dhe versioni i saj binte ndesh me prova filmike. -Pamjet e kamerave të sigurisë nuk e mbështesnin rrëfimin e saj, megjithatë ato nuk u paraqitën siç duhet në gjykatë. -Disa dëshmitarë kanë deklaruar se policia i ka ushtruar presion për të “zbukuruar” deklaratat apo për të gënjyer drejtpërdrejt në gjykatë.
Alibia e fshehur Një nga zhvillimet më të rëndësishme lidhet me një alibi të mundshme. Pamje të CCTV-së tregojnë një person që i ngjan Benguit duke përdorur një kabinë telefonike rreth 25 minuta pas vrasjes.
Dokumente të reja tregojnë se në atë moment është kryer një telefonatë drejt furnizuesit të tij të drogës – një detaj që përforcon pretendimin se ai nuk ndodhej në vendin ku prokuroria pretendonte se ishte.
Sipas hetimit, policia ishte në dijeni të kësaj piste, por ajo nuk u hetua plotësisht.
Thirrje për rishqyrtim Ish-hetues dhe ekspertë të drejtësisë kanë kërkuar që çështja të hetohet nga autoritetet e pavarura. Rasti aktualisht po shqyrtohet nga Komisioni për Rishikimin e Çështjeve Penale, i cili mund ta rikthejë çështjen në Gjykatën e Apelit.
Benguit, tashmë 53 vjeç, mund të kërkojë lirim me kusht nëse pranon fajësinë. Por ai refuzon kategorikisht.
“Do të preferoja të vdisja në burg sesa të pranoja një krim që nuk e kam bërë,” është shprehur ai./Marrë nga BBC, përshtati në shqip Piranjat News
