Rrëzohet nga biçikleta, kryeministri grek përfundon në spital

Një incident i vogël ka ndodhur ditën e sotme me kryeministrin grek Kyriakos Mitsotakis, i cili është rrëzuar nga biçikleta teksa po lëvizte në zonën e Haniës, në Kretë.

Sipas mediave greke, pas incidentit, Mitsotakis është paraqitur në urgjencën e Spitalit të Haniës, ku ka marrë ndihmën e parë mjekësore.

Mediat sqarojnë se kryeministri ka pësuar një dëmtim të lehtë në dorë, si dhe disa gërvishtje të shkaktuara nga fërkimi gjatë rrëzimit.

Pas marrjes së ndihmës mjekësore, Mitsotakis është larguar nga spitali. Para se të largohej, ai ka biseduar për disa minuta me qytetarët dhe pjesëtarë të stafit të spitalit.

Sipas raportimeve, incidenti nuk ka qenë serioz dhe kryeministri grek nuk ka pasur nevojë për trajtim të mëtejshëm spitalor.