Rritet numri i viktimave në Nepal, 579 të vdekur dhe 1.924 të zhdukur

Të paktën 579 persona kanë humbur jetën në Nepal, ndërsa 1.924 të tjerë rezultojnë të zhdukur, pas përmbytjeve dhe rrëshqitjeve masive të dheut që goditën zonën e Himalajeve pranë kufirit me Tibetin.

Mes personave të zhdukur ndodhen edhe qindra turistë dhe pelegrinë të huaj. Autoritetet po vijojnë operacionet e kërkim-shpëtimit në zonat e prekura, ndërsa bilanci i viktimave është rritur.

Në anën kineze të kufirit, autoritetet kanë raportuar pesë viktima në Tibet, duke e çuar në të paktën 584 numrin e përgjithshëm të të vdekurve në Nepal dhe Kinë.

Mijëra pjesëtarë të ekipeve të shpëtimit po marrin pjesë në operacionet në të dyja anët e kufirit. Kërkimet zhvillohen në kushte të vështira, ndërsa në rajon vijon rreziku i përmbytjeve të tjera.

Ndërkohë, Bashkimi Evropian ka njoftuar një paketë emergjente prej 2 milionë eurosh për Nepalin. Presidentja e Komisionit Evropian, Ursula von der Leyen, deklaroi se fondet synojnë të mbështesin familjet dhe komunitetet më të prekura.

Operacionet për gjetjen e personave të zhdukur vazhdojnë dhe bilanci mbetet i përkohshëm.