Rusia lëshon urdhër arresti ndërkombëtar për themeluesin e “Telegram”, Pavel Durov

Rusia ka njoftuar lëshimin e një urdhri arresti ndërkombëtar ndaj themeluesit dhe drejtorit ekzekutiv të Telegram, Pavel Durov, duke e akuzuar për bashkëpunim dhe nxitje të terrorizmit.

Sipas një deklarate të Shërbimit Federal të Sigurisë (FSB), Durov, i cili ka shtetësi ruse, franceze dhe të Emirateve të Bashkuara Arabe, dyshohet se ka bashkëpunuar në aktivitete terroriste në kuadër të një hetimi penal që lidhet me rekrutimin dhe trajnimin e të rinjve rusë nga shërbimet sekrete ukrainase për akte sabotimi.

FSB pretendon se platforma Telegram nuk ka bllokuar një bot të njohur si Leo Match, i cili, sipas autoriteteve ruse, është përdorur nga agjentë ukrainas për të kontaktuar të rinj rusë, duke u paraqitur si vajza të reja dhe më pas duke i shtyrë drejt sulmeve ndaj forcave të rendit dhe akteve të sabotimit ndaj infrastrukturës energjetike dhe transportit.

Autoritetet ruse bëjnë të ditur se që nga korriku i vitit 2025 janë arrestuar 46 shtetas rusë, të moshës 12 deri në 22 vjeç, të cilët dyshohet se janë përfshirë në këto aktivitete.

Ndërkohë, Pavel Durov ndodhet në Francë, ku është nën hetim që prej vitit 2024 për akuza që lidhen me mosveprimin ndaj përmbajtjeve kriminale të shpërndara në Telegram. Ai ndodhet nën kontroll gjyqësor dhe nuk mund të largohet nga territori francez pa autorizimin e autoriteteve.

Pas njoftimit të Moskës, në llogarinë zyrtare të Telegram në platformën X u publikua një imazh i Durovit duke ngritur gishtin e mesëm, ndërsa vetë ai dhe kompania nuk kanë bërë ende një koment zyrtar mbi akuzat.

Telegram, i themeluar në vitin 2013, është një nga aplikacionet më të përdorura të komunikimit në botë dhe luan një rol të rëndësishëm në shpërndarjen e informacionit si në Rusi ashtu edhe në Ukrainë. Pavarësisht përpjekjeve të Moskës për të kufizuar përdorimin e platformës, edhe institucionet shtetërore ruse, përfshirë Kremlinin dhe Ministrinë e Mbrojtjes, vijojnë ta përdorin atë për komunikimet zyrtare.