Kryeministri Edi Rama ka zgjedhur të shkëputet nga rutina e përditshme e politikës dhe ka nisur pushimet në bregdetin e Dhërmiut...
BOTA
Satanisti terrorizon famullitë e krishtera/ Ja veprimet e pazakonta në ambientet e objekteve
PiranjatPërditësimi i fundit 3 Gusht 2026, 22:34
Një burrë 48-vjeçar, i cili e quante veten "vampir" dhe terrorizoi famullitë në jug të Britanisë për muaj me radhë, duke lënë drerë të prerë, qengja të therur dhe kryqe të përmbysura brenda dhe jashtë kishave, është urdhëruar të shtrohet në një spital psikiatrik, pasi gjykata vendosi se ai vuan nga çrregullime të rënda mendore.
Sipas Daily Mail, Benjamin Lewis, 48 vjeç, nga Totton, Southampton, kishte deklaruar në një seancë të mëparshme gjyqësore se e quanin "Konti Drakula". Sipas provave të paraqitura në gjykatë, ai kishte qenë i fiksuar pas vampirëve që nga fëmijëria dhe besonte se pirja e gjakut të kafshëve do t'ia zgjaste jetën, duke e shpëtuar nga vdekja dhe ferri.
Midis shkurtit dhe korrikut 2025, Lewis kreu të paktën 13 sulme ndaj kishave në zonën New Forest, në Hampshire.
La kokën e një dreri jashtë një kishe
Ai vidhte kafshë nga fermat, i vriste dhe më pas vendoste kokat ose trupat e tyre të gjymtuar në amvone, stola, oborre dhe hyrje kishash, duke i shoqëruar me kryqe të përmbysura, letra tarot dhe simbole të tjera satanike.
Në një nga rastet më tronditëse, të dielën e Pashkëve, ai la kokën e një dreri jashtë një kishe, së bashku me një letër tarot. Në një tjetër rast, ai vari qengja të therur në shtizën e flamurit të kishës, pasi u kishte prerë fytin.
Prokurorët thanë se incidentet shkaktuan frikë të madhe te besimtarët, aq sa shumë prej tyre shmangën pjesëmarrjen në shërbesat fetare. Fëmijët që panë kafshët e ngordhura pësuan tronditje të rëndë psikologjike.
ADN-ja dhe kamerat e sigurisë e zbuluan autorin
Policia vuri re se sulmet përkonin me data të rëndësishme në kalendarin satanik dhe organizoi një operacion të fshehtë mbikëqyrjeje në kishat e zonës.
Autori u identifikua përfundimisht falë pamjeve të kamerave të sigurisë dhe materialit gjenetik të gjetur në një nga qengjat e therur.
Gjatë arrestimit të tij, në bagazhin e makinës u gjet gjak dreri, ndërsa në automjet u zbuluan gjurmë gjaku të kafshëve të ndryshme.
Simbole satanike dhe libra për vrasjet
Kontrolli në banesën e tij zbuloi një skenë veçanërisht shqetësuese. Policia gjeti vizatime të vampirëve dhe deleve të ngordhura, simbole satanike, kryqe të përmbysura, shënime të shkruara me dorë ku thuhej: "Është kënaqësi të jesh vampir", udhëzime për rituale, prerje gazetash mbi vdekje, si dhe libra rreth kulteve, vrasësve serialë dhe mënyrave për të vrarë njerëz.
Në një valixhe u gjetën gjithashtu fotografi që paraqisnin njerëz duke prerë njëri-tjetrin dhe duke pirë gjak.
"Ekziston rreziku që të kalojë nga kafshët te njerëzit"
Psikiatri që e ekzaminoi dëshmoi se Lewis vuan nga autizmi, çrregullimi obsesiv-kompulsiv (OCD), një çrregullim i përzier i personalitetit, një çrregullim i lehtë mendor i dyshuar dhe një prirje e theksuar për të jetuar në botën e imagjinatës.
Gjatë vlerësimit psikiatrik, ai madje u përpoq të sulmonte psikiatrin dhe u desh të neutralizohej.
Specialisti paralajmëroi se ekzistonte një rrezik real që dhuna që ai ushtronte ndaj kafshëve të përshkallëzohej dhe në të ardhmen të drejtohej edhe ndaj njerëzve.
E kaluara me sulme ndaj një prifti
Nuk ishte hera e parë që Lewis përballej me drejtësinë.
Në vitin 2003, ai u dënua me një vit burg për një fushatë shumëvjeçare ngacmimi ndaj një prifti në një fshat të Hampshire.
Ai dhe dy bashkëpunëtorë të tij bërtisnin jashtë shtëpisë së priftit, hidhnin fishekzjarre, bënin telefonata ngacmuese, porosisnin taksi në adresën e tij, postonin materiale pornografike në tabelën e njoftimeve të kishës dhe, sipas gjykatës, madje pinin gjakun e njëri-tjetrit.
Ky ishte rasti i parë në Britani ku një person u ndoq penalisht për ngacmim të motivuar nga urrejtja fetare ndaj një të krishteri.
Do të qëndrojë në një njësi psikiatrike
Gjykata vendosi se veprat penale të Lewis-it justifikonin një dënim me disa vite burg, por urdhëroi shtrimin e tij në një institucion psikiatrik, sipas legjislacionit për shëndetin mendor. Ai do të qëndrojë në një njësi të posaçme psikiatrike derisa autoritetet kompetente të vendosin ndryshe.
Pas shpalljes së vendimit, 48-vjeçari u kërkoi falje viktimave të tij, duke deklaruar se nuk kishte pasur qëllim të shkaktonte frikë te qytetarët apo te efektivët e policisë. /PiranjatNews/
