SHBA anulon stërvitjen me Korenë e Jugut, trupat zhvendosen drejt Lindjes së Mesme

Shtetet e Bashkuara kanë anuluar një stërvitje të përbashkët ushtarake me Korenë e Jugut, të planifikuar për muajin shtator, ndërsa Pentagoni po përqendron trupa dhe kapacitete ushtarake në Lindjen e Mesme për shkak të konfliktit të vazhdueshëm me Iranin.

Zyrtarë ushtarakë amerikanë dhe koreanojugorë kanë konfirmuar anulimin e stërvitjes Ssangyong, e cila zhvillohet mes dy aleatëve dhe përfshin një numër të konsiderueshëm trupash dhe mjetesh ushtarake.

Sipas raportimeve, në vend të stërvitjes së përbashkët, Koreja e Jugut planifikon të zhvillojë aktivitetin ushtarak në mënyrë të pavarur.

Vendimi vjen në një moment kur Pentagoni po riorganizon kapacitetet e tij ushtarake në disa fronte. Presidenti amerikan Donald Trump ka deklaruar se SHBA-ja mban rreth 39 mijë trupa në Gadishullin Korean, në kuadër të marrëveshjes së mbrojtjes me Korenë e Jugut.

Ndërkohë, edhe stërvitja tjetër e përbashkët Ulchi Freedom Shield (UFS) është zhvilluar në një format të shkurtuar. Aktiviteti, i cili zakonisht zgjat 11 ditë, këtë vit u reduktua në vetëm pesë ditë.

Sipas raportimeve, shkurtimi i stërvitjes u bë në kuadër të prioriteteve të administratës Trump, ndërsa Uashingtoni ka kërkuar të ruajë hapësirë për diplomaci dhe kontakte me Korenë e Veriut.

Anulimi i Ssangyong shënon një tjetër rregullim të rëndësishëm në aktivitetet ushtarake amerikane në Gadishullin Korean, në një kohë kur vëmendja strategjike e Pentagonit është përqendruar gjithnjë e më shumë te Lindja e Mesme.