SHBA godet Iranin për natën e 11-të radhazi, Teherani kërcënon me hakmarrje dhe paralajmëron zgjerimin e luftës

Shtetet e Bashkuara kanë ndërmarrë sulme ajrore ndaj Iranit për natën e 11-të radhazi, ndërsa tensionet në Lindjen e Mesme vijojnë të përshkallëzohen. Teherani ka paralajmëruar Uashingtonin se çdo goditje ndaj objekteve të tij bërthamore do të konsiderohet një zgjerim i konfliktit, duke kërcënuar me sulme ndaj interesave amerikane dhe aleatëve të saj në rajon.

Komanda Qendrore e SHBA-së (CENTCOM) bëri të ditur se vala e fundit e sulmeve kishte si objektiv qendrat e operacioneve ushtarake iraniane, kapacitetet detare, hangarët e avionëve, depot e dronëve dhe infrastrukturën logjistike ushtarake. Sipas saj, operacionet synojnë të dobësojnë aftësinë e Iranit për të kërcënuar anijet tregtare që kalojnë në Ngushticën e Hormuzit. Nga ana tjetër, mediat shtetërore iraniane raportuan se sistemet e mbrojtjes ajrore u aktivizuan në Teheran, ndërsa shpërthime u dëgjuan edhe në Tabriz, Chabahar, Konarak dhe Bushehr, ku ndodhet i vetmi termocentral bërthamor i Iranit.

CENTCOM akuzoi Iranin se gjatë tre muajve të fundit ka sulmuar mbi 30 anije tregtare në Ngushticën e Hormuzit, duke theksuar se këto sulme kanë rrezikuar lirinë e lundrimit dhe sigurinë e qindra marinarëve. Ndërkohë, presidenti amerikan Donald Trump deklaroi se objektivi i radhës mund të jetë kompleksi nëntokësor bërthamor “Pickaxe Mountain”, pranë Natanzit, ku sipas SHBA-së Irani po ndërton një strukturë të padeklaruar për pasurimin e uraniumit. “Do ta godasim atë zonë shumë shpejt dhe shumë fuqishëm. Nuk ka asgjë që ata mund të bëjnë për ta ndaluar”, deklaroi Trump gjatë një takimi në Shtëpinë e Bardhë me presidentin libanez Joseph Aoun.

Në reagimin e saj, komanda ushtarake iraniane Khatam Al-Anbiya paralajmëroi se një sulm ndaj objekteve bërthamore do të konsiderohej zgjerim i luftës në të gjithë rajonin, duke kërcënuar me sulme ndaj të gjitha interesave amerikane, aleatëve dhe mbështetësve të tyre. Përshkallëzimi i konfliktit është reflektuar edhe në vendet fqinje. Ushtria e Kuvajtit njoftoi se sistemet e saj të mbrojtjes ajrore u angazhuan për të neutralizuar dronë iranianë, ndërsa Bahreini dhe Jordania raportuan se kishin interceptuar dronë dhe raketa.

Situata është tensionuar më tej pas paralajmërimeve të rebelëve Huthi në Jemen, të mbështetur nga Irani, të cilët njoftuan bllokimin e Ngushticës Bab al-Mandab për anijet saudite. Si pasojë, dy cisterna me naftë saudite ndryshuan itinerarin, duke u kthyer drejt Kanalit të Suezit.

Analistët paralajmërojnë se këto zhvillime rrezikojnë të shkaktojnë ndërprerje të mëtejshme të transportit detar ndërkombëtar dhe luhatje të forta të çmimeve globale të naftës. Ndërkohë, Sekretari amerikan i Mbrojtjes, Pete Hegseth, deklaroi para Komitetit të Buxhetit të Senatit se lufta me Iranin i ka kushtuar deri tani SHBA-së rreth 37.5 miliardë dollarë, rreth 8 miliardë më shumë se vlerësimi i bërë në muajin maj. Ai paralajmëroi se, pa fonde shtesë nga Kongresi, ushtria amerikane do të detyrohet të kufizojë aktivitetet dhe stërvitjet ushtarake.