SHBA i vë fre Ukrainës/ Kjo është kërkesa e Vance ndaj Zelenskyt

SHBA i ka kërkuar Ukrainës të kufizojë sulmet me dronë ndaj cisternave të naftës në Detin e Zi, pranë një terminali të lidhur me Konsorciumin e Gazsjellësit Kaspik (CPC), ku kanë interesa edhe kompani amerikane.

Sipas Financial Times, çështja është ngritur nga zëvendëspresidenti amerikan JD Vance në një telefonatë me presidentin ukrainas Volodymyr Zelensky më 31 korrik.

CPC transporton naftë bruto nga Kazakistani përmes territorit rus drejt një terminali detar pranë Novorossiysk, nga ku ngarkesat dërgohen më tej drejt tregjeve në Evropë dhe Azi.

Në konsorcium kanë interesa ruse, kazake dhe perëndimore, ndërsa mes aksionarëve amerikanë janë edhe Chevron dhe ExxonMobil.

Sipas burimeve të cituara nga Financial Times, Uashingtoni është shqetësuar se sulmet ukrainase mund të dëmtojnë interesat e kompanive amerikane dhe të ndikojnë në tregjet ndërkombëtare të naftës. Vance i ka kërkuar Zelenskyt që sulmet ndaj cisternave pranë terminalit të ndalen.

Pas ndërhyrjes amerikane, Kievi raportohet se ka vendosur mekanizma të rinj për të përcaktuar objektivat. Një zyrtar i lartë ukrainas i tha gazetës se Ukraina i dëgjon me kujdes partnerët amerikanë.

Sipas raportimit, Ukraina mund të ketë përdorur gjithashtu çështjen e sulmeve si pjesë të negociatave me SHBA-në. Një burim i Financial Times ka thënë se Kievi pranoi kërkesën amerikane në një kohë kur po kërkonte një licencë për prodhimin e raketave interceptuese Patriot.

Administrata amerikane kishte premtuar më herët mbështetje për Ukrainën, por më pas dërgesat shtesë të sistemeve të mbrojtjes ajrore u vunë në pikëpyetje për shkak të nevojave të krijuara nga konflikti me Iranin.

Ndërkohë, Rusia i ka cilësuar sulmet ndaj cisternave si “akte terroriste” dhe ka akuzuar Ukrainën për goditjen e infrastrukturës civile. Edhe Kazakistani ka reaguar ndaj sulmeve, duke i konsideruar ato të papranueshme për interesat e tij ekonomike dhe duke paralajmëruar për pasoja në tregtinë e energjisë dhe zinxhirët e furnizimit.

Ukraina nuk ka pranuar publikisht përgjegjësinë për sulmet. Kievi i ka kërkuar Kazakistanit dhe vendeve të tjera të prekura të shmangin akuzat që i konsideron të nxituara dhe të pabazuara.