Një aksident rrugor është regjistruar rreth orës 09:10 të mëngjesit të kësaj të diele në aksin kombëtar...
BOTA
SHBA vendos sanksione ndaj dy gjyqtarëve të Gjykatës Ndërkombëtare Penale
PiranjatPërditësimi i fundit 18 Dhjetor 2025, 20:11
Shtetet e Bashkuara njoftuan sot vendosjen e sanksioneve ndaj dy gjyqtarëve të Gjykatës Ndërkombëtare Penale (GNP), të cilët po zhvillonin hetime lidhur me Izraelin, kryeministri i të cilit, Benjamin Netanyahu, është objekt i një urdhër-arresti të lëshuar nga Gjykata që nga nëntori i vitit 2024.
Në një deklaratë për media, Sekretari amerikan i Shtetit, Marco Rubio, justifikoi këtë vendim duke theksuar se dy gjyqtarët kishin votuar së fundmi, së bashku me shumicën e Gjykatës, për refuzimin e një kërkese të Izraelit, e cila kontestonte kompetencën e GNP-së për të hetuar krime lufte që dyshohet se janë kryer gjatë luftës në Rripin e Gazës kundër Hamasit.
“Ne nuk do të tolerojmë abuzimin me pushtetin nga GNP-ja, i cili shkel sovranitetin e SHBA-së dhe Izraelit dhe vendos padrejtësisht qytetarë amerikanë dhe izraelitë nën juridiksionin e saj,” theksoi Rubio në deklaratë.
Departamenti amerikan i Shtetit njoftoi gjithashtu se do të vazhdojë të vendosë “konseguenca” ndaj çfarëdo abuzimi të pushtetit nga Gjykata.
Gjyqtarët që janë objekt i sanksioneve janë Gotcha Lordkipanidze, ish-Ministre e Drejtësisë e Gjeorgjisë, dhe Erdenebalsuren Damdin nga Mongolia.
Nga ana e saj, Gjykata Ndërkombëtare Penale hodhi poshtë sot sanksionet e reja të SHBA-së, duke i quajtur ato të papranueshme.
“GNP-ja refuzon kategorikisht sanksionet e reja amerikane të vendosura ndaj gjyqtarëve Gotcha Lordkipanidze (Gjeorgji) dhe Erdenebalsuren Damdin (Mongoli),” theksohet në një komunikatë të Gjykatës së Hagës.
Sanksionet përfshijnë ndalimin e hyrjes së gjyqtarëve në SHBA dhe “ngrirjen” e çdo transaksioni financiar ose pronësie me ta në ekonominë më të fuqishme të botës.
